Petualangan Sukab

Cerbung Betawi Urban

Tangan Siapé? (24)

Sukab balikin muké, kebayang bakal temuin roman semulus Putri Bilqis di balik cadar tipis trahansparan. Taunyé, bujubunèng! Palényé digetok popor senapang pembunuh beruang, ampé dunié nyang barusan ajé terang, balik jadi gelap lagéh.        

Tau nape, serasé kedengeran gambang-kromong hajé di kupingnyé.        

Laju laju, pera-u laju …       

Lagu gambang-kromong kecampur apé lagi nggak tau dèh. Mimpinyé kayak wayang semalem suntuk, tapinyé nyang campur-haduk. Palényé puyeng.       

Ntu kepuyengan mingsi kejadian waktu matényé melèk.       

Sukab udé adé di tengé tempat nyang doi intip.       

“Sorry Bang, terlalu keras nggetoknyé tadi, nggak apa-apa kan?”       

Hmm. Nyang punyé suaré burung tekukur. Sukab téngokin ke samping èn bolényé kuciwa, liatin ntu roman cumak kliatan matényé. Émang maté Bilqis sih, blalak-blalak, tapi kalow masker dibuké lantas mulutnyé betaring kayak Drakula Srimulat pegimané?       

Idung Sukab endusin bau sabun, pastinyah si boss sarungan nyang kebelet pigi Singapur nyambungin tangan.       

“Siapé lagi ini kunyuk? Kambrat kelian?”       

Sopir èn kernèt matényé mendelong. Doi lagi doi lagi, pikirnyé.       

“Bukan Bang, tapi doi piralin soal ntu tangan nyang jadi ramé.”       

“Piralin pegimané?”       

Cepet banget ntu sopir èn Man si kernèt dicocor si boss nyang tangan anaknya dipangkas.      

“Ooooh! Jadi kelian emang bener-bener mau ngebuang ntu tangan anak gué buat dijadiin makanan ikan yé? Dasar!”      

“Ampun Bang, pan émang dibayar untuk itu Bang.”      

“Napé pulak nggak mau bilang siapa nyang suru?”      

“Mingsi pengin idup Bang.”      

“Napé nggak mikir guah juga bisa bunuh elu!”      

“Kami tahu Abang orang baik …” Sopir udé ndéprok nyembah-nyembah.    

Si boss nyang udé rapi pake batik kliatan kesel banget.    

“Orang baik? Kelian bakal gua kasih makan buaya tau!? Angkat!”

***

Begitulah kejadiannyé. Ntu sopir èn kernet dibawé dué centèng penjaga Bambang èn Bimbing nggak tau ke mane. Apé bener dikasih makan amé buayé? Wallahualam bissawab.             

Pegimané nangsib Sukab?            

Seabisnye dikasi makan macaroni schotel, doi dilepas begitu ajah.            

Di luar gerbang, dengen kepala mingsi sedikit puyeng, Sukab jalan kaki nyebrangin lapangan alang-alang nyang nggak ada apa-apanya.             

Di siang nyang panas, Sukab bukan cumak bingung mesti jalan ke mane, tapi jugak bingung mikirin lingkaran setan tangan nyang belon jugak adé kejelasannyé.            

Tangan nyang ketemu di truk émang udé beres urusannyé, yakni balik amé nyang punyé.             

Tapi buat Sukab ini kagak cukup. Siapé nyang suru potong èn kenapè? Emang sembarang potong apé émang ngincer tangan anak si boss?             

Abis itu, apé adé urusan amé tangan-tangan di gedong tinggi nyang diliat Karta? Sukab inget jugak siaran tipi nyang umumin soal ntu tangan ilang. Beda-beda urusan apé adé kesamaan sumbernyé?

Semingkin panas ajé rasényé siang di padang alang-alang. Walow berangin. Walow akhirnyé karang berujan.              

Ujan bener-bener deres. Pegimané carényé batok kepalé nyang tadi anget kepanasan, karang mendadak jadi basah amé aèr ujan? Sukab liat ke kiri kanan nggak adè tempat nedu. Sial dangkalan, pikirnyé, baru ajé kilat samberin kiri kanan jalan setapak.             

“Ntu petir nyamperin ané, bisé mateng ané kayak saté bakar kluarin asep.”            

Tanah lempung rerumputan nyang diinjeknya bisé bikin jato keplèsèt, tapi Sukab tetep ajé jalan cepet. Kagak adé cara laèn. Cumak kliatan pu’un atu di ujung sono. Lumayan gedé èn bisé untuk betedu.

Emang mesti cepet-cepet sih, maka Sukab pun lari. Aèr ujan nyang nyamber muké lumayan bikin sakit.            

Langit jangan ditanya lagi kayak apé gelapnyé. Aèr mulai ngegenang di kaki Sukab, bikin doi jadi sedikit panik.             

Doi cepetin larinyé. Itu waktu doi kejato sehebab adé nyang ngeganjel kakinyé!            

Apaan?            

Sukab liat ke dalemnya genangan aèr.             

Tangan!

(Bersambung)

*Ilustrasi: 2022, Dodo Karundeng

 

Be the first to leave a comment!

Leave a Reply

Your email address will not be published.