Petualangan Sukab

Cerbung Betawi Urban

Tangan Siapé? (19)

 “Yaolo ….  Karta!”

Karta nyang udé kagak punyé tangan kanan ngegelébak. 

“Astagénagé! Karta! Siapé nyang ngebacok elu Ta!”            

Orang-orang ngerubungin Karta nyang matényé mendelik èn tangan kirinyé nunjuk-nunjuk kayak adé nyang doi tunjuk, tapinyé terus doi lewat …           

“Innalillahi wa inna illaihi rojiun …”           

Baca-baca dèh orang-orang. Bang Pol nyang udé mau panggil ambulans jadi batalin ntu niat.

 “Semingkin runyam dèh,” katé Bang Pol, “berangkat bawak tangan, pulang keilangan tangan …”

Sukab ikutan pusing, kebayang ujan tangisan di gubuk Karta nyang mustinyah burok.            

Apé bisé bèrèsin ini mengsélé secepetnyé? Siopak nyang musti bèrèsin, èn pegimané carényé?    

Bang Pol nyang udé lemes karang cumak mikirin Karta. Apé musti paké truk juga pulangnyah?    

Tapinyé udé penu manusiah ntu tempat. Polisi, hansip, satpam, préman, pengangguran, tamu warung, ojolers, orang léwat, orang nyari-nyari kesempetan, tau’ kesempetan apèh …            

Bener-bener gègèr, lampu mobil polisi nyang biru méré langsun banyak ajah di situh.            

“Minggir! Minggir! Ini Tempat Kejadian Perkara!”            

“Lhah! Bukan di sini Pak Té-ka-pényé! Di sono noh, di seberang! Mesti naèk jembatan ke sononyé!” katé Yati nyang panik warungnyé kené getah.            

“Bukankah di sini tempat kematian korban, Nona?”            

“Syèt-dah! Paké nona-noné, di sini mah koitnyé doang Pak, dibacoknyé di sono!”            

“Tekapénya dari sana sampai sini jadinya bukan?”            

“Huss! Mobil-mobil nggak bolé léwat? Ini pan jalan artéri Bapak!”            

“O hiya! Maafkan sahaya Nona.”            

“Syèt-dah …”            

Jenazah Karta cepet diangkut, katényé mau diperèksa tim porènsik. Sebenernyah banyak lagih nyang mau disuru ke kantor polisi, tapi Bang Pol cepet ajuin diri bari unjukin kartu anggautah. Emang bener ntu tindakan, ibarat burung terbang ikutin burung-burung laèn nyang bulunyah samah.            

Léwat tengé malem baru sepi. Rombongan kampung nelayan pulang amé truknyé, bari bawak kabar burok amé keluarga Karta.            

Tinggal Siti nyang bakal jaga warung ampé pagi. Sukab liatin ntu peti ès nyang isinyé tangan.            

Apé mingsi bisé disambungin? 

***

Tau’ berapé lamé Sukab ketiduran. Mustinyé nggak lama, orang badannyé nyang ngegélétak di bangku mingsi rasa ancur begicu. Doi mau bukak matényé kagak jadi, denger suara orang ngomong nyang doi kenalin.             

Rupényé ntu dué orang ngibril bari gegares.             

“Énak bener nih nasi amé térong gorèng,” kayak suaré kernèt ntu truk nyang Sukab nemu tangan.             

Kayak baru kemarèn, émang baru kemarèn.             

“Mikir makanan melulu elu Man, héran …”             

Man! Emang ntu panggilan kernètnyé.              

“Abisnyé mau apé lagi Bang? Syukur-syukur ntu tangan nyang mustinyé kite buang udé ketemu lagéh. Pegimané kalow enggak, bisé runyam kan? Bisé-bisé tangan kité nyang ilang! Malah bisé-bisé bukan cumak tangan sebelé, tapi dué-duényé!”            

“Tangan kita mah mingsih bisé ilang Man.”            

“Kok?”            

“Lhah nyang mestinyé udé dibuang ke laut, malahan piral, pan salényé kité!”            

“Abang sih maèn-maèn amé ntu dué buruh harian kismin, kagak kepikiranlah doi bakal maèn piral, jadi kité tau ini warung. Kalow bener-bener kité ilangin ntu tangan karang, enggaklah kalow trus tangan kité dipotong.”            

“Ah, énté Man, siapé nyang mau ngebuang?”            

“Jadi, Abang bakal apain?”            

“Kité bakal kembaliin, mumpung ntu tangan mingsih bisé disambung!”            

“Bujubunèng!”            

“Yo-i! Bujubunèng! Cilakanyah kité mesti alihin perhatian dengen caré kayak tadi Man, mahal amir ini tangan.”            

“Iyé yé, nggak cukup atu tangan. Nyawényé ikut ngilang …”            

“Mengkényé …”            

Sukab ngebalik purak-purak tidur beneran, tapi kuping amé pikirannyé mingkin awas.            

Pegimané care ngebuntutin èn ngelaporin ini dué orang pembunuh Karta? 

(Bersambung)

*Ilustrasi: 2022, Dodo Karundeng

 

Be the first to leave a comment!

Leave a Reply

Your email address will not be published.