Petualangan Sukab
Cerbung Betawi Urban
Tangan Siapé? (18)
Klang-kling-klang-kling!
Klang-kling-klang-kling!
Klang-kling-klang-kling!
Hapé Yati bunyi mulu. Semué nanyak tangan nyang dimangsoed Yati dalem makloemat piralannyé.
“Alkamdulilé Nèng, tangan anak ayé ketemu. Tau dèh apé dosényé, lagi énak-énak mancing, tau-tau dateng ajé ntu dua orang. Atu mégangin, atu nyabet paké golok, trus ngilang paké motor.”
“Kapan kejadiannyé Mpok?”
“Baru minggu lalu Nèng.”
“Waaahh, nyang ini baru kemarèn Mpok, kan gitu piralan ayé.”
“Yaolooo … dipasangin ajah kagak bisé yé?”
“Ya enggaklahyaw! Ntar nyang punya tangan dipasangin apé?”
Sukab ngitungin berapé kali’ tuh hapé bunyi. Doi kira-kirain, nglebihin tangan-tangan di èmbèr nyang dilihat Karta apé kagak. Lantes jadi inget Karta juga. Mané ntu orang?
Yati jadi pusing.
“Mesti gimana nih Kab?”
Sukab nanya lagi ke Bang Pol.
“Pegimané Bang?”
Bang Pol nyang kekenyangan amé nasinyé Siti, betahak duluan sabelonnya ngejawab.
“Hoooiiik! Gampang kan Kab? Ya dipotongnya ntu kemarin apé bukan, gitu aja toh?”
“Émang bener Bang, tapi pegimané nasib nyang lain-lain yé? Apé jadinyé tangan-tangan kepisé amé pangkalnyé?”
“Berat Kab,” katé Bang Pol, “ngurus nyang atu ini ajé futsing!”
Tapinyah Sukab tetep ajé mikir.
“Pegimané caranyé segitu banyak tangan bisé kepotong ramé-ramé yé?”
Kalow tangan nyang doi dapet ntu ditaruk kernèt èn sopir di dalam truk, pegimané kejadiannyé amé tangan-tangan nyang laèn? Nyang atu ini di dalemnyè bak truk, apé nyang laèn dibuang ke kali, ke sampah, ke teras rumah orang, apé dipakètin ke luar negri? Bakal apaan?
Tangan nyang diurusin Sukab udah léwat 24 jem dari waktu mingsi anget diketemuinnya. Kayaknya banyak tangan-tangan laèn nyang diembat sabelonnya ituh.
Cras-cras-cras!
Cras-cras-cras!
Cras-cras-cras!
Begicu Sukab ngebayanginnyé. Di mané-mané orang bawé golok tajem, ngincer, èn nyabet dari tangan nyang atu ke tangan nyang laèn pas nggak adé orang. Udé berapé lame ntu gerakan potong tangan dikerjain? Nyang nèlpon Yati adé nyang bilangnyah dua minggu lewat. Busyèt. Apé nggak lapor? Apé lapor tapinyé didiemin ajé? Napé nggak piralin ajé bakal semué orang tau?
Nyang dipikirin Sukab, apé mingsih adé tangan nyang bakal diembat lagéh?
“Yat!”
“Yezzz?”
“Mesti dipiralin jugak orang ngincerin tangan di mané-mané! Mesti diingetin tuh.”
“Siap Jenderal!”
Syèt-dah si Yati, pikir Sukab, malulah di deketnyé adé Bang Pol, yang walow dari kampung kan polisi beneran.
Ini dia makloemat piralan Yati, mingsih paké gambar tangan di dalem peti ès buwat ikan seger.
WASPADA!
AWASI TANGAN ANDA!
Saudara-saudara sebangsa dan setanah air, sebagai kelanjutan masalah penemuan tangan, diketahui bahwa ternyata banyak tangan telah dipotong, dibawa pergi, dan tidak diketahui di mana rimbanya, kecuali beberapa yang ditemukan secara kebetulan.
Saudara-saudara sebangsa dan setanah air, pemberitahuan ini disampaikan, karena tidak bisa dipastikan pemotongan tangan tersebut sudah berhenti.
WASPADA! AWASI TANGAN ANDA!
Seru juga nih, pikir Sukab, biarin polisi jadi siboek, emangnyé ada Rambo nyang laèn? Enggak kan?
Tetep ajah Sukab mikirin nangsib nyang punya tangan bawaan doi.
“Pegimané Bang?” Doi nanyak Bang Pol lagéh.
“Tunggulah semalem ini Kab, biar udé lebi 24 jem, kalow paké pesawat jèt pribadi kali’ sempet disambungin.”
“Ntu kalow punya jèt, kalow kismin?”
“Ya tamat …”
“Mestinya sih nggak ada nyang kismin yé, kalow maunyé tebusan.”
“Kita belon tahu juga maunya apé Kab.”
Tau-tau …
“Kab …”
Sukab tolèhin palényé. Semué orang bengong binti matényé kliatan jeri, bari tangannyé nunjuk-nunjuk ke arah tangga jembatan penyeberangan.
“Hah?! Karta?! Karta?!”
Dari sebaliknyé tempat nyang remeng-remeng, kliatan Karta jalannyé limbung kayak mau jatoh. Bajunyé penu daré.
Tangannyé! Tangannyé! Nyang kanan udé nggak adé!
(Bersambung)
*Ilustrasi: 2022, Dodo Karundeng