Petualangan Sukab

Cerbung Betawi Urban

Tangan Siapé? (2)

“Kab ….”

“Huss! Ngantuk nih!”

“Kaaabbb …”

“Apaan sih Boel? Udé tau jugak ngantuk binti laper, obatnyé kan cumak tidur?! Mané ini truk goyang mulu lagéh!

Sukab amprokin palényé ke dengkul nyang nekuk, kayak nyang nggak mau ngeliat kenyataan idup. Tapinyé ini kali si Kaboel senggol-senggol, malah goyangin ntu dengkul.

“Kab, Kab, liatin dulu dong …”

“Apéééh ..,” kesel bener Sukab, singkirin tangan Kaboel.

“Kab! Liatin!” Kaboel ikutan kesel dèh!

Melèklah Sukab.

“Awas kalow ngibul doang,” doi néngok males-malesan.

Pas geteran lanté truk semingkin kenceng, ntu tangan kayak ngedeket.

“Uih!” Sukab ilang ngantuknyé. Matényé di gelap-gelap gitu mingkin gedé. “Tangan siapé tuh!”

“Tauklahyaw!”

“Coba bukak ntu terpal, Boel!”

Takut-takut, Kaboel angkat ntu terpal nyang bikin tangannya kayak kepotong.

Èh! Kepotong beneran!

Ntu tangan nggak ada sambungannyé. Cuma telapak ajé ampé ke siku. Geteran truk bikin ntu tangan maju mundur. Kayak mancing- mancing péngin dipegang.

Sukab amé Kaboel liatin ntu tangan kayak liatin tongtonan. Tapaknyé puti, alus kayak tangan perempuan, tapinyé gelap-gelapan begitu kagak jelas jugaklah, ntu tangan perempuan apé tangan laki-laki nyang mingsi remajé.

“Siapé nyang narok di sini ya Boel?”

“Apé bukan nyang bawak ini truk?”

“Enggaklah, kalok ambil orang kayak kité, terus kitényé lapor polisi gimané?”

“Lha kité mau lapor kagak?”

“Huss! Ntar dululah! Pikir dulu Boel, kalow iya nyang tarokin di sini ntu orang pan berabé.”

“Énté bilang enggaklah tadé.”

“Iyé. Kité nggak tau pasti kan?”

“Dilémpar kalé Kab.”

“Dilémpar pegimané?”

“Ya kalow énté bilang bukan sopir apé kernèt nyang mustinyé nggak mau ada orang tau doi tarok tangan di situ, ya tamtu orang laèn kan nyang tarok. Tapi ané bilang sih lèmpar waktu truk léwat. Bukan tarok baèk- baèk. Mané bolé jadi kan?”

“Dilèmpar apé nggak dilèmpar, sopir amé kernèt nggak tau. Ntu paling mungkin, kalow kagak, doi nggak ambil kité naèk ke belakang. Iyé kan?”

Kaboel ketap-ketip kayak orang susah mikir, tapi seenggak- enggaknyé émang mikir.

“Mikir apé énté Boel?”

“Cem-macem Kab.”

“Nyang semacem ajé Boel, apé salé satunyé?”

“Mbayangin ajé pegimane kejadiannyé,” katé Kaboel, “tangan dipotong terus dilémparin truk lewat. Émang nggak denger yé ntu bedué?”

“Nggaklah kalow jalan ramé èn geronjal gludhak-gludhuk.”

“Lagi mikir juga ntu kenapé tangan dipotong yé? Dipotong seabisnyé dibunu apé mingsih idup?”

“Kejauhan énté mikirnyé Boel …”

“Ah ketimbang nganggur jugak Kab,” saut Kaboel, “ketimbang nganggur èn bingun, mendingan mikir …”

“Walow rada ngawur …”

Kaboel nggak mau denger lagé, ngerendem dalem doi punyé batok kepalé.

Halnyé Sukab, doi bingun mikirin truknyé, nyang nggak kluar- kluar dari tol, bablas nggak abis-abis.

“Mengkali émang adé hubungan kelakuan ini truk amé ntu potongan tangan,” pikir Sukab.

Doi lirik ntu tangan nyang kayak ngerayap èn ngedeket. Jantung Sukab kayak main drum.

“Lhah, ini kan kayak tangan si …..”

(Bersambung)

*Ilustrasi: 2022, Dodo Karundeng

 

Be the first to leave a comment!

Leave a Reply

Your email address will not be published.