Nggak tahu napé Sukab pantatnyé mingser sono mingser sini, kayak ntu bangku adé bangsatnyé, pédahél mané bisé ntu bangku bebangsat, kalow jelas papannyé rate kagak adé celah ngumpetnyé.
“Pantat lu gatel Kab?”
“Iyé, kebanyakan bangsat nih!”
“Mané bisé,” katé Kaboel, “papan raté, ari-ari disemprot disinpèktan lagéh!”
“Oh, bukannyé di bangku bangsatnyé, di sono noh!”
“Mané bolé jadi, bangsat di sono, gatelnyé di pantat énté, Kab?”
“Bisé ajé Boel, ini bangsat bukan sembarang bangsat.”
“Apé dong, bangsat kok bise gigit dari jau.”
“Émang bukan bangsat beneran Boel.”
“Bukan kepinding mangsudnyé?”
“Yo-i!”
“Apé dong?”
“Bé-bé-ka.”
“Bébékah? Apaan tuh?”
“Bangsat-Bangsat Koruptor.”
“Ooohhh, nyatir nih yé? Bangsat mah mingsi kebagusen Kab.”
“Mustinyé?”
“Iblis laknat sétan bekasakan.”
“Huzz! Kité pan kagak suci juga Boel.”
“Pastinyé! Tapi apé nyang kité korupsi? Waktu? Pan kité keseringan oper-taim nggak paké dibayar. Dermawan kité Kab!”
“Énté mah werkaholik, bukan dermawan, ampé diusir-usir amé mandor.”
“Werkaholik? Apényé burung kulik?”
“Kerja itu candu bagimu.”
“Wueitz! Basa Endonésah!”
“Ané cius nih Boel, korupsi nyang gila-gilaan ntu nggak cumak bikin pantat gatel, tapi seluru bangsé kita jadinyé gatel-gatel kayak biduran nyang kagak jelaz sebabnyé.”
“Héhé! Kalow judul disertasi: Eksistensi Bangsat sebagai Sumber Kegatalan Bangsa.”
“Disertasi kedokteran, biologi, apé psikologi sosial?”
“Héhéhéhé! Ngilmiah Kab? Balik analisis gèmbèl aja dèh, jadi pegimané carényé koruptor mingsi adé di bumi pertiwi ini Kab?”
“Anabèl ajé énté maunyé Boel, pegimané bisé majuh? Paké répérensi duonk!”
“Pèr amé busi? Mangsudnyé?”
“Bacaaaa! Iqra’ !”
“Astagénagé! Ampé ke sono-sono Kab?”
“Ntu bédanyé amé angsal cuap tauk?! Emangnyé ané mèdsos?”
“Tau’ ah, gelap.”
“Nah, kegelapan ini mengsélényé Boel, ini modelnyé koruptor nggelibed binti ngelès.”
“Pegimané tuh?”
“Aksinyé kagak ngelanggar hukum.”
“Ntu baru achli yé?”
“Keahlian kadal! Ini bukannyé sekadar nyolong Boel, ini ngegares tanah air bangsé, plus masa depannyé!”
“Émang bisé?”
“Apé?”
“Masa depan dikorupsiin?”
“Lhah kalow jutaan hektar énté keduk abis tanpa sisé, lantes tananyé bakal jadi padang pasir, apé bukan dirampok buayé naményé?”
“Pan duitnyé bakal ngebangun bangsé Kab?”
“Ngebangun apaan? Bahasa Endonésah ajé kagak bener-bener, ini era bancakan tau’?”
“Apé iyé sih Kab? Pan Pak Jokowi baèk.”
“Ooooooohhhh, Pak Jokowi mah émang baèk bangetz, tapi baèk ajè nggak cukup buat ganyang ini maling-maling.”
“Jadi?”
“Pak Jokowi musti smart sekaligus kejem!”
“Semar mané bole kejem Kab.”
“Huzz! Bukak kamoes duonk, smart, basa Enggris Boel! Èn musti bisé kejem amé temen-temen sendiri!”
“Téga bener temen-temennyé yé?”
“Émang bukan temen dari kecillahyauw! Temen-temen nyang nemplok karena politik, alih-alih ngebangun bangsé, ngebangun kantong kendiri dèh jadinyé!”
“Bangsat!”
“Nnnah! Pegimané nggak jadi gatel ini pantat jadinyé pan?”
Tau-tau langit terang. Siti tarok dué bungkus uduk nyang paling duluan jadi.
“Udé anabèlnyé? Nyarap dulu yé?”
Pondok Ranji,
Jumat, 15 Oktober 2021. 06:24.