Petualangan Sukab

Cerbung Betawi Urban

Tangan Siapé? (11)

Mentari nongol dari pinggir laut, diem-diem tané jadi terang ajé, èn ntu tangan jugé semingkin jehelaz. Tapinyé kagak adé kesempetan takjub amé ntu langit nyang jadi ajaib, gegaré urusan tangan di tipi nyang ujug-ujug pindah ke sinih.            

“Émang lu pikir gué apé?”             

Bang Pol nyang tersinggung pèr-nyé mingsih ngedesek.            

“Ya polisi, Bang.”

“Jadi kalow polisi udé pastinyé bakal malak gitu?”

“Kan émang gitu Bang, Abang nyang polisi masa kagak tau?”

“Èèèhh! Elu!”

Tangan Bang Pol udé keangkat ajé, bakal kasi kèprètan amè si sopir gedé gombong.            

Cepet nelayan-nelayan ntu alangin, ngeri bayangin akibatnyé kalow si sopir jadi dikèprèt tangan saktinyé Bang Pol.             

“Jangan Bang, tolong Bang, sabar Bang,” katé ntu orang-orang, “ribet ntar nguburnyé kalow si bégo ini ngegelimpang di sini.”            

Denger katé ngegelimpang jadi gemeter dèh dengkul si gombong. Langsun ngedèprok pegangin kaki Bang Pol.            

“Ampun Bang, ampun Bang ….”            

Kendor jugé jadinyé Bang Pol.            

“Ya udé, jadi siapé ntu nyang mau kasih duit bakal ambil ntu tangan?”

 “Tau’ dèh Bang …”

 “Bener-bener bokis luh,” Bang Pol kesel dengernyé, “nape percayé ajé amé orang nggak kenal?”

“Pan udé kasih panjer Bang.”

“Oooohhhh! Gétu yé! Pantesan!”

“Cuman sejuta Bang!”

“Haahh! Haré géné sejuta elu bilang cuman?!”

“Yaaahh, janjinyé pan seratus …”

“Émang disuru ngapain kalow udé dapet?”

 “Buang ke laut? Napé?”

“Buat dimakan ikan!”

“Bujubusyèt! Bener-bener bokis ntu orang!”

“Ya doi bayar kan? Kagak bokis dong!”

 “Bayar sejuta iya, nyang sembilan-sembilan nggak jelas gétuh.”

“Lhah, kalow udé dapet èn buang ya mesti dikasi dong!”

“Hmm …”

Sétan liwat. Sepi bentar. Sukab nyang mikir sekarang. 

Apé ntu orang bakal balik ngasi duit sembilan-sembilan juta? Doi tamtu musti yakin ntu tangan udé dibuang bakal makan ikan.             

Apé nggak ribet yé kalow musti liat sendiri?             

Napé nggak difoto paké hapé terus dikirim ajé?            

Kalow udé keliatan tangan dimakan ikan mau apé lagi kan?             

Abis itu duit ditramper pake hapé jugé. Tapi maèn hapé apé kagak ni orang-orang?            

Mengsélényè, émangnyé mingsi adé orang nggak pégang hapé walow di kampung nelayan juga?

“Ntu tangan mesti cepet disambung,” katé Bang Pol, “lupain dululah ntu jejaring ruwet.”

“Cari peti ès,” katé Kaboel.            

Banyaklah peti ès di kampung nelayan, tempat narok ikan-ikan seger. Cumak tinggal ngeganti ikan-ikan amé ntu putungan tangan.             

Dianter ke mane?            

“Itu mah udah jelaz,” katé Bang Pol.            

Paké truknyé si gedé gombong. Ramé-ramé rombongan berangkat ke Jakarta. Peti ès ditaruh di tengah bak truk. Abis itu orang-orang padé bediri muterin ntu peti ès, kayak takut si tangan bisé ajé adé nyang ngambil.            

Sukab nyang ngantuk melulu tetep inget urutan kejadian semalem. Kalow doi nggak duduk di bawényé jembatan layang, tempat biasényé doi ngejegrek rindu order, doi nggak bakalan kelibet urusan buntungan tangan.            

Mestinyé orang laèn nyang kenak! Bener-bener soal nangsib!            

Nyang dipikirin amé Sukab, napé ntu tangan nggak lansun dibuang ajah? Masukin karung, buang ke sampah nyang ngegunung. Pan bisé? Napé mesti tarok ke dalemnyé truk, lantes kayak disengajain bakal ditemuin amé buruh-buruh harian kayak Sukab?              

Lanjutannyé jugé ngebingungin. Napé mesti ampé ke laut èn nggak dibawak kendiri ajé? Mesti adé alesan buwat ngrencanain rapih, walow ntu rencané udé gatot alias gagal total. Nggak mungkin soal ngembaliin tangan masup dalem akal bulus. Atawa bisak? Futzing dah kepalé Sukab.             

Truk mingsih ngebut di jalan tol. Semalem adem full angin, karang panasnyé nggak ketulungan. Untung ajé kalow ngebut jadinyé adé angin, tapi siapé bilang jalan tol nggak adé macetnyé? Di muké gerbang tol ya bisé ajé mancet abis. Seabisnyé gerbang tol ya sepaling-palingnyé mancet. Naményé Jakarté. Mancet lagé mancet lagé dah! Apé mingsih sempet disambungin ntu tangan?

(Bersambung)

*Ilustrasi: 2022, Dodo Karundeng

 

Be the first to leave a comment!

Leave a Reply

Your email address will not be published.