Petualangan Sukab

Cerbung Betawi Urban

Tangan Siapé? (9)

Terpaksé doi bawak dèh ntu karung nyang isinyé tangan. Nyénggol-nyénggol kaki, kadang kerasa kayak si tangan idup sekali-sekali ngeremet kaki Sukab.            

“Huss! Pegang-pegang ajé énté!” katényé sambil jalan.           

“Bawé bekel yé? Banyak amat,” katé kernèt nyang kurus banget kayak lidi.           

“Alat-alat,” saut Kaboel ngelès, walow jelas-jelas cumak pacul amé pengki ajé butunyé. Mengkényé doi sambungin, “Kali-kali ajé …”           

Deketin truk nyang udé penu orang, Sukab bilang amé si Kaboel cepet-cepetan.           

“Boel, énté naèk ajé, ané musti kembaliin ini tangan. Kecian ntu orang kalow kagak betangan …”           

Trus Sukab purak-purak kayak nyang jatoh kenak angin duduk.            

“Aduh …”            

Kaboel sih langsung ngeh, tapi kan musti maèn lénong jugé?            

“Kab, kenapa Kab? Sakit?”            

Sukab ngegereng.            

“Udah, énté jalan ajah buruan …,” doi bisik-bisik.            

Pas si kernèt jugak ngedeket.           

“Énté sakit?”            

“Jalan ajah kelian …” katé Sukab.           

“Yo-i! Titipannyé mané tapih?”            

“Titipan apé?”             

Walow gelap, kalow orang jeli, keliatan banget roman si Kaboel pucet.            

“Sok téu loh! Poré-poré nggak ngerti, énté pikir bisé nyampé ke tempat jau begini cumak kebeneran? Mané barangnyé?”            

“Barang apé?”            

“Hmmh! Belagu banget,” katényé bari maju mau ambil ntu karung, “harté kelian kan cumak pacul amé pengki, pasti inih barangnyé.”             

Doi maju mau ngrebut, tapi Sukab nyang sakitnyé poré-poré pegangin kenceng. Ntu dué orang tarik-tarikan.             

“Lepasin! Lepasin! Lepasin!”             

Kernèt nyang kurus ni bener-bener maksa’. Kaboel cepet bantuin Sukab. Tarik dari bagian sononyé.            

Udé barang tamtu sedari nyang Sukab poré-poré ambruk, ini drama bikin orang-orang di warung amé di bak truk padé dateng ngerubung, termasuk sopir nyang tetep biarin mesin truknyé idup. Kebalikan dari kernètnyé, jogrokannyé si sopir lumayan gedé.              

“Adé apé ni ribut-ribut?” Katényé.              

Nelayan-nelayan nyang nyampé duluan mau misahin, tapinyé ntu kernèt kurus ngotot bener narik karungnyé, ampé ngebalik belakangin Sukab kayak tarik tambang agustusan.              

“Hoooi! Lepasin dulu dong!” katé orang-orang, “apé kagak bisé diomongin baèk-baèk?”              

Pagi mingsih remeng-remeng, jadinyé belon kelewat jelas apé nyang jadi mengsélé. Mingsih kagak jelas èn mbingungin gitu, nyelonong masup si sopir badan gedé. Doi pegang ntu karung, maksa narik dengen tenagényé nyang gedé.             

Doi kagak peduli semué orang bilang sabar, atawé mengsélé bisé diomongin nggak paké rebutan. Doi pégang karung ntu kayak nyang bisé ambil begitu ajah, tapi ya kagak bisé, orang Sukab èn Kaboel kagak kalah ngototnyé. Cuman, tenagé gedé sopir ditambah ngotot kayak tarik tambangnyé si kurus, bikin Sukab amé Kaboel kesèrèt maju.              

Pegangin karung gandumnya kendiri kenceng banget. Orang-orang bingun jugé mesti pegimané.   

“Mang, Mang, Mang, mau ampé kapan tarik-tarikan, bukannya musti cari makan?”              

“Émang bener nggak bisé Bang? Mau tarik-tarikan ampé kapan?”              

“Apa sih isinyé ntu karung nyang jadi rebutan?”              

Bari kencengin jari-jari nyang udé pegel pegangin ntu karung, Sukab mingsi sempet mikir. Jadi emang sengajé ané amé Kaboel dibawak ke sini, bakal disambung angkut lagi amé ini truk, nyang jelas-jelas urusannyé ntu tangan. Tapi ngapain susah-susah? Ngapain nggak dikasih ajé kendiri?               

Bisé ajé sih ntu kontak-kontakan dibikin nggak nyambung, jadinyé masing-masingnyé tetep aman. Mustinyé gitu kan? Karang ane inget, walow truknya sama, sopir amé kernèt nyang bawak kité ampé ke sini tuh èmang nggak perné liat. Nyang jelas doi-doi nggak mikir kité-kité bakal liat nyang dipotong tangannyé di tipi. Tapi kok padé yakin tangan dalem ini karung bakalan ané ambil yé? Kiré-kiré ajé èn nggak diambil nggak apé-apé? Tapi pegimané amé nyang dateng ambil? Pan bisé ajé kité nggak ambil ntu karung?               

Tarik-tarikan karung gandum mingsih seru. Tarik sana, tarik sini, tali matinyé jadi renggang … ampé tau-tau nongol ntu tangan!

(bersambung)

*Ilustrasi: 2022, Dodo Karundeng

 

Be the first to leave a comment!

Leave a Reply

Your email address will not be published.