Petualangan Sukab

Cerbung Betawi Urban

Tangan Siapé? (10)

“Huwaaaaaa!!!!”

Lantes sekejep nggak adé suaré. Yo-i. Bentaran ajé. Tapinyé abis itu.

“Tangan!”

“Tangan!”

“Tangan!”

“Tangan nyang tadi di tipi!”            

“Nggak adé tangan tadi di tipi …”            

“Iyéééé, tangannyé orang nyang nggak punyak tangan tadi di tipi!”

“Tangan!”

“Tangan!”

“Tangan!”

“Huss! Tangan-tangan mulu! Kok bisé nyampé ke sini ini tangan? Bang Pol, turun tangan dong!”           

Nyang tarik menarik udé diem abis ketauan apé nyang jadi rebutan. Apé padé rebutan duit? Itu nyang kepikir kalow mingsi inget omongan Bang Pol, nyang bilang adé duitnyé tuh …            

Pas orang-orang mau rebutin ntu tangan, secepet alap-alap Bang Pol samber karungnyé.            

“Tahan dulu opat manusiah nyang tadi rebutan!”            

Alkisyé, nelayan-nelayan nyang tadi bingung, karang tau-tau mantep ajé pégangin Sukab, Kaboel, sopir badan gedé, amé kernètnyé nyang kuyus. Dibawa balik ke warung, lantes ditanya-tanyak apé urusan doi amé ntu buntungan tangan.            

Sukab amé Kaboel ceritain semua. Tapi Bang Pol bingung juga mesti percaya apa nggak.           

“Jadi kelian émang nggak kenal amé ntu sopir èn kernèt truk nyang bawak énté ke sinih?”           

“Boro-boro Bang!”           

“Sopir amé kernèt nyang inih?”            

“Lebi boro-boro lagé Bang!”            

“Dua kali boro-boro dong.”            

“Betul Bang!”             

“Beneran dua kali?”            

“Betul Bang!”           

“Boro-boro-boro-boro gitu Blèh?”            

“Suka-sukalah Bang, nyang penting emang nggak kenal Bang!” katé Kaboel begayé slèngèkan.

“Hmm, ané nggak bakal merèksa kelian kayak polisi beneran, ané paké pengalaman èn hinsting hajé liatin roman-roman muké kelian nyang lugu, walouw banyak juga nyang lugunyé cumak lugu-lugu falsu.”          

“Kami lugu beneran.”            

“Huss! Lugu beneran ntu nggak tau dirinyah lugu!”            

“Kayak orang gilak nggak tau dirinya gilak?”           

“Nah, tuh kayak orang pinter, nggak lugu-lugu amir ternyatah!”            

“Lho, kami bener-bener lugu beneran!”            

“Wuèitz! Nggak gitu caranyé poré-poré loegoe méhong!”            

“Siap!”            

Ampé di sini Bang Pol nggak langsun jawab. Waktu jawab serious bener ngomongnyé.            

“Tulung yé! Tulung! Walow ané polisi, ané paling empet denger orang sipil dikit-dikit ngomong ‘siap’ èn ‘izin’. Itu katé-katé diucapin kayak mesin, nggak ngerti bobot èn artinyé. Jadi ané empet. Jehelazzz?”     

Kaboel ampir ajé ngomong ‘siap!’ tapinyé cepet diganti manggut-manggut.            

Bang Pol cukup puas, lantes ganti nginterogasi sopir badan gedé amé kernètnyé nyang kayak jerangkong.            

“Kalow kelian apé urusannyé amé ini tangan? Kok mau ambilnyé ngotot gétu?”            

“Kami dijanjiin duit gedé soalnyé.”            

“Hmmhh! Seberapé gedé?”            

“Apé perlu ané bukak di sini?”            

“Èh! Mendingan dibawa ke kantor apé pegimané?”            

“Napé musti dibawé?”            

“Lhah énté menghalangi penyelidikan soalnyah!”            

“Jangan dong Bang, kami orang loegoe!” katé si kurus binti pucet romannyé.            

“Wèèèèhh! Angsal kepergok cepet ajé bilang lugu-lugu!”            

Diem ajé ntu dué pengaku lugu. Bang Pol émang mantep kayak polisi, ditambah émang paké seragam, nyang di maté orang lugu beneran ya lumayan berwibawa.            

“Nah, kalow émang lugu, berapé dapetnyé?”            

“Pul-jut.”            

“Pul-jat-pul-jut .. berapé percisnyé?”            

“Cepèk.”            

“Itu naményé tus-jut bégo, bukannyé pul-jut.”            

“Maklumlah Bang,” katé sopir badan gedé nyang rupanyah gedé-gedé gombong jugé dikit, “kalow jujur kan bisé dipalak.”            

Bang Pol naik daré jadinyé.            

“Apé? Elu pikir ané bakalan ambil duit elu?!”

(bersambung)

*Ilustrasi: 2022, Dodo Karundeng

 

Be the first to leave a comment!

Leave a Reply

Your email address will not be published.