Petualangan Sukab

Cerbung Betawi Urban

Tangan Siapé? (7)

“Bisé ajé doi-doi nggak tau artinyé pan?”                                    

“Tau dèh Kab, rasényé serbé aneh ajé.”                                    

“Nggak papalah anéh, asal nggak jadi mengsélé ajé.”                                    

“Mudah-mudahanlah! Capèk jugé mikirin tangan ni.”                                   

Waktu balik dari pipis ngomonglah si kernèt.                                    

“Huuuhh lama bèèng setor Ibu Pertiwi.”                                    

“Pan udé dari kapan-kapan, Bro,” katé Bahloel.                                    

“Bra-bri-bra-bro! Tadinyé Bang!”                                    

“Ups! Sorry Bang! Tèlèr keunclak truk nih …”                                    

Sukab nyusul ngedeket. Kedengeran suaré jangkrik. Kunang-kunang di mané-mané. Jadi inget désa nyang ditinggalin. Kalow malem gelap jugak kayak gini.                                    

“Begini,” ujar sang kernèt, “tunggu di buk itu yé? Ntar dateng ntu truk proyèknyé. Tenang ajé!”                                  

Kagak nunggu jawaban, langsun naèk lagi si kernèt. Lantes ngabur ntu truk ke ujung jalan, tempat adé warung nyang ngladènin nelayan.                                     

Karuan ajé bengong ntu dué manusiah ditinggalin kayak gitu.                                    

“Pokoknyé bebas dari ntu tangan,” katé Sukab.                                    

Kaboel mingsi bengong. Liatin ntu truk muter di ujung, bakal balik lewatin doi lagéh. Apa ikutan balik lagi ajah? Pikir si Kaboel. Mending nggak dapet orderlah ketimbang nggak tenang begini. Inget lagi doi senengnyah cengèngèsan amé temen-temen analis gèmbèl di warung. Laèn bepikir doang laèn pengalaman rupanyah!                                    

“Boel! Awas!” Sukab ingetin Kaboel nyang ngelamun.                                    

Ntu truk abis muter lantes tancep gas. Suarényé amit-amit ribut banget, tapi cepetnyé jugé nggak kiré-kiré! Gruzak-gruzak-gruzak nglewatin ntu dué buruh harian nyang lemes, ngantuk, binti kelaperan.

Waktu lagi lewatin, wwrrrr, adé barang nyang dilemparin dari dalem truk …. 

“Hoooi! Adé nyang ketinggalan tuh!”                                    

Kedengeran si kernèt teréak.                                    

“Hahahahahahaha!”                                   

Kedengeran bunyi bleg!                                    

“Apaan tuh Kab?”                                   

“Tengokinlah!”                                   

Dalem gelap Kaboel ngedeketin ntu barang. Karung gandum nyang paké tali. Makanan kali’, pikir Kaboel, pastinyé kebawé laper.                                    

Doi bukaklah ntu iketan tali.                                   

“Ahhhhhhhh!!!”                                    

“Napé Boel!” Sukab lari ngedeket. Dipatok uler kali’ si Kaboel, pikirnyé.                                    

“Liat ajah!” Kaboel nyang lari ngejauh mukényé pucet.                                    

“Tinggal aja Kab! Ngapain jugak bawak-bawak itu lagéh.”                                   

Sukab tetep deketin ntu karung gandum.                                    

“Alamak!”                                    

Emang alamak, èn kenapa kagak alamak kalow di dalem karung ntu lagé-lagé ntu tangan nyang nongol lagéh.                                    

Sukab ambil ntu karung.                                    

“Napé dibawé lagéh, bisé susyé idup kité Kab.”  

Sukab nggak nanggepin.                                    

“Bawak alat-alat énté Boel, kité nyarap dululah, laper banget!”                                    

Kaboel ngintil, tapi ngomong terus.                                    

“Napé nggak ditinggal ajé sih, biar ajah digondol jaing.”                                   

“Huss! Kiré-kiré dikit Boel! Énté mau kalow ini tangan énté trus dikasih ke jaing?”                                   

Kaboel kediem jadinyé. Karang doi jadi inget laper lagéh. Makin deket ke ntu warung, makin kecium bau masakan.                                    

“Adé telor ceplok nggak ya …” pikir Kaboel.                                    

Sukab nyang juga kelaperan nggak nyadar, sebab tali nyang ngiket karungnyé kendor, ntu telapak tangan nongol keluwar …

(bersambung)

*Ilustrasi: 2022, Dodo Karundeng

 

Be the first to leave a comment!

Leave a Reply

Your email address will not be published.