“Diadu énak nggak sih Kab?”

“Tergantunglahyaw.”

“Pada cantélan?”

“Ah, énté Dul, ya tergantung diadu bakal apé…”

“Mangsudnyé?”

“Bakal jago apé bakal domba …”

“Émang bédanyé apé?”

“Kalow adu jago, énté jago, kalow adu domba, énté domba.”

“Mending jadi jago dong, diadu domba kan bégo.”

“Jadi jago nyang diadu juga bégolahyaw!”

“Hmm, ini sih bukan domba melèngken kambing.”

“Héhéhé, adu kambing dong!”

“Yo-i, adu kambing!” Ari mingsi terang, tapinyé kerjaan mingsi susyé. Jadilah orang-orang ngobrol kagak jelaz. Adu kambing beda amé adu dombalah, èn seterusnyé. Bagusnyé warung kagak perné sepi. Nasi apé ajé nyang adé pastinyé diantré. Nasi uduk, nasi kuning, nasi goreng, nasi gilé, apé ajé, bubur pun jadi. Bener-bener berkah. Yati amé Siti non-stop gantian, èn Siti tamtu nglembur kalow Yati musti ngerjain skripsi.                          

“Kité ngomongin kambing puti, apé kambing item nih Dul?”                          

“Nyang ané bayangin sih kambing nyang mau dipotong.”                          

“Kambing kurban?”                          

“Yo-i!”                         

“Nah, gitu kan, adu kambing kurban?”                         

“Betoel!”                         

“Gini Dul, atu, lahir jadi kambing ntu artinyé mesti jadi makhluk nyang dikurbankeun, alias dipotong bakal gegares orang kismin. Ya kan? Dué, kalow diadu ntu juga pengurbanan nyang laèn.”                          

“Mangsudnyé?”                          

“Pan, adé nyang ngadu Dul.”                          

“Ah, iyé, kité mikirnyé ngeliat nyang diadu mulu yé, Kab? Kagak mikir nyang nggak keliatan, nyang ngadu!”                      

“Nnnah! Layak pengamat énté Dul! Kité musti bisé bayangin nyang kagak keliatan …”

“Karena hapa?”

“Doi nyang maèn!”

“Maèn apé?”

“Ah, Duuuull! Maèn politik dong!”

“Wueitz! Politik nih yé?”

“Huss! Ini bukan anabèl, emang gitu politik Dul, adu jago, adu domba, adu kambing, adu kambing kurban, adu kambing item, ntu semuényé siasat dalam politik.”

“Waw!”

“Nyang ngadu beradu!”

“Dua kali waw!”                          

“Nyang ngadu ngurbanin apé ajé èn siapé ajé nyang bisa diperalat èn dikurbanin èn seterusnyé!”                         

“Tiga kali!”                          

“Ah, énté, ulahgumunanatuh!”                          

“Bukan gumunan Kab, ntu nyang ngadu ntu pinter bener sekaligus jahat bener apé pegimané mangsudnyé?”                         

“Èh, siasat ngadu-ngadu ntu bukannyé atu orang ajé nyang mikir.”

“Bebanyak gitu?”

“Nyang pinter-pinterlah!”

“Nyang jahat-jahat mangsudnyé?”

“Itu énté nyang bilang yé? Nyang punyé akal buluslah! Pinter tuh bukannyé Einstein jugaklahyaw!”

“Ooooh, anabèl? Analis gèmbèl? Samé ajé profesor togèl dong!”

“Naményé kerèn abis, paké bahasé Enggris lagéh.”

“Apaan?”

Think-tank.

“Ooohh, septic-tank!

“Lho kok sèptik tèng?”                          

“Atu, udé jelas bukan Einstein bukan Stephen Hawking; dué, itu namé paling bener bakal orang-orang nyang kerjaannyé cumak mikirin adu jago, adu domba, adu kambing, adu kambing kurban, adu kambing item. Angguran jugak nganggurlahyaw!”

Dul Komprèng lantes bediri èn pigi bari muter topi pètnya ke depan balik normal.

Sukab gèlèng-gèlèng kepalè liatinnyé.

“Luar biasé,” pikirnyé, “sèptik tèng …”

Pondok Ranji, 

Jumat 1 Oktober 2021. 05:43.

 

Be the first to leave a comment!

Leave a Reply

Your email address will not be published. Required fields are marked *