“Meledug, Kab?”

“Meledug abis.”

“Napé lagi yé? Baruuuu ajé mulai ramé-ramé paksin!”

“Atu, kemantepen bener mau kumpul-kumpul ajé; dué, susyé bener sih diatur nyang padé kebelet mudik, kondangan, dé-èl-èl; tigé, ini sih émang Kopid nyang laèn, nyang lebih kejem èn lebi cepet matiin orang, kagak peduli orang gedé, orang tué, apé anak-anak. Liat ajé grapik naèknyè, bekali lipet lebi cepet kan?”

“Anak-anak kené jugé?”

“Yo-i! Kagak pandang bulu dah!”

“Maut kan émang nggak pandang bulu Kab …”

“Nggak gitulah ngeliatnya, itu pasrah nggak kréatip naményé.”

 “Wueits! Jadi adé yé mati kréatip gitu?”

“Kréatip artinyé tetep kasi makna kalow nyang naményé idup ntu émang adé hargé.”

“Memang élok manusié yé?”

“Kalow kerjé mah iyé, kalow berdjoang terus, èn kagak sialan.”

Nyengir kudé dèh Dul Komprèng.

“Émang adé nyang sialan Kab?”

“Adélahyaw! Ntu bakul-bakul nasi nyang bisényé cuma makaaaaann doang bari nyap-nyap, ampun dah …”

Yati masup, siap gantiin Siti nyang jaga semaleman. Bener émang mol amé restoran tutup padé, tapinyé rakyat kecil mesti makan di mane? Suru mati kelaperan? Ntu mengkényé warung tetep buké walow lokdaun ntu bener banget.

“Ini warung kalow bejarak nyang bener duduknyé, limé orang jugé udé pol, nggak bakallah ditutup, malah petugas-petugas nyang ngerazia gegaresnyé jugak di ini warung,” katé Sukab kapan diminté pertimbangan amé Yati.

Emang ajaib ini warung. Semenjek ntu Akang Kopid melélérajé pesenan lewat hapé bikin omzètnyè naèk ampé 300%. Jali amé kawan-kawan ojèkersnyé ribet bener mondar-mandir ambil èn anter pakèt makanan. Nasi uduk Betawi, nasi kuning Flores, nasi liwet Solo, nasi guri Acèh, nasi kapau Padang gonta-ganti semuényé laris manis hajé. Belon lagi macem-macem buburnyé. Baroké! Tangan adem Mang Ayat rupényé nurun ke Yati, ponakannyé nyang nyambi kuliah di Pamulang.

“Ané péngin tau ajé Kab,” katé Dul Komprèng bari angkat masker nyeruput kopi, “ntu bakul-bakul nasi bakal bekoar lagi nggak yé?”

“Naményé pedagang politik Dul, ari-ari nyari pekaré nyang bisé digorèng èn dijual bakal isyu politik.”

“Komoditas politik mangsudnyé?”

“Yo-i! Dari nyang gedé bakal potensial-makar, ampé nyang kicik-kicik èn udil-udil jatah mèdsos, semuényé mah dikerjain hajé!”

“Jahat bener!”

“Doi pikir mah ntu udé tugasnyé …”

“Tugas bossnyé?”

“Tugas idupnyé!”

“Astagénagé!”

“Gitulah Dul! Kalow nalar udé disuapin déterjen, nyang serbé syirik dipikirnyé bener ajah!”

“Nggak bisé diapé-apéin tuh?”

“Bisé!”

“Bisé? Carényé?”

“Ya dilawan, ditandingi, diimbangin amé nyang bener.”

“Emang bisé?”

“Pastinyalahyaw! Tetep ajé bukan hoax nyang dicari orang, melèngken kabar nyang krédibel.”

“Nggedibel tebel mangsudnyé?”

“Huss! Krédibel ntu bisé dipercayé Dul!”

Masup Si Kaboel, langsun minté kopi jagung.

“Lokdaun lagé, lokdaun lagé …,” katényé.

Sukab tungguin Kaboel duduk, lantes pasang omong.

“Ati-ati kalow ngomong Boel,” katényé, “ané bilang sih Si Kopid meledug lagéh, justru akibat negri kité kurang lokdaun itu!”

“Nyang bener …”

“Èh, énté pikir kalow lokdaun nyang udé-udé dicabut apa sebabnyé? Emang karena jumlah nyang kenak udé kurang kan?”

“Iyé yé …”

“Jadi, kalow lokdaunnyé belon brenti sabelonnya Kopid abis, bisé nggak?”

“Bisé dong.”

“Nah, bakal dijalanin gitu nggak kira-kira?”

“Pasti enggaklah!”

Sungguh mati, Sukab péngin tau banget kenapé.

Pondok Ranji,

Kamis, 1 Juli 2021. 08:52.

 

Be the first to leave a comment!

Leave a Reply

Your email address will not be published. Required fields are marked *