Sukab mingsi merem-merem ayam di ta’pang waktu warung udé sepi. Malem-malem tau napé keinget ajé ntu berité orang diangkat jadi propéntor, walow nggak perné ngajar di kuliahan, boro-boro doinyé kendiri kuliah.

“Pan propéntor kehormatan Kab,” katé Dul Komprèng, “ngapain paké ngajar beneran, atawé kuliah beneran, nggak perlulah!”

“Émang adé nyang kayak gitu?”

“Ya nggak adé, mengkényé bébas dibikin ajalah!”

“Itu sih gokil naményé!”

Dul Komprèng kontan bediri.

“Katakan pada beta,” katényé sembén ngrentangin dué tangan, “apé sih nyang kagak gokil di dunié ini?”

Ntu émang mengsélényé, apé nyang kagak gokil di dunié ini.

“Nyang ajaib bingitz,” katé Sukab lagéh, “émang bisé yé, bikin analisis tentang dirinyé kendiri?”

“Héhéhé.”

“Ajaib bener dunié ini, tapi …”

“Tapi apé Kab?”

“Tau nggak nyang bener-beneeeerrr ajaib!”

“Apé tuh?”

“Segitu ajaibnyé tetep diaminin lhoh!”

“Itu mengsélényé Kab, sang propéntor boléh ngebet ntu gelar nggak sahih, tapinyé nyang ngasih, nyang ngrapatin sabelon ngasih, pejabat èn menteri-menteri nyang dateng buang waktu ngaminin, apé semuényé enggak jugé ajaib?”

“Zaman ajaib.”

“Bangsa ajaib?”

“Jangan! Ntu manusiah-manusiah silaken ajé ngajaibin diri, tapi bangsé kite jangan ampé kecemplung semuanyah dalem ketololan nggak berampun!”

Sukab bukak masker. Nyeruput kopi jagung nyang disodorin Siti walow kagak minté. Udé maklum ajé nyang tadinyé merem bakal melèk binti nerocos.

“Emang segitu banyak orang tolol semué Kab?”

“Nah! Kalow tolol beneran mah rada kurang dosényé Dul.”

“Otak maknyadikupyak mau diapain lagi yé?”

“Lho otaknyé kendiri sebenernyé kagak napé-napé Dul, tapi niat di baliknyé ntu otak nyang bikin semué jadi gawat.”

“Gawat? Gawat nyang pegimanah?”

“Sebab ntu otak nyang cukup pinter untuk jadikeun nyang punyé otak jadi pejabat tinggi, mesti poré-poré ngaminin ketololan demi restu kekuasaannyé.”

“Restu?”

“Yo-i! Restu nangkringin jabatannyé, restu kampanye duluan kali’ …”

“Lhah taon 2024 kan mingsih jauh.”

“Mau jauh kèk, mau deket kèk, ntu kursi kepresidenan udah jadi inceran. Kalow mau dapet, émang kudu dari sekarang dipikirin mateng-mateng Dul.”

“Mikirin kursi?”

“Mikirin kekuasaan.”

“Pembagian kekuasaan!”

“Nah!”

Dul Komprèng nenggak kopi jagungnyé lantes tutup masker lagéh.

“Ntu émang nyang lagi kejadian Dul,” katé Sukab bari nyamber bergedèl jagung, “poré-poré tolol angsal kebagian kuwèh kekuasaan.”

“Otak dipaké bakal poré-poré tolol?”

“Yo-i!”

“Ketauan nggak tuh?”

“Ini jugé mengsélé Dul, orang banyak nggak mesti bisé bédain mané nyang pinter tapi poré-poré tolol demi kekuasaan, atawé tolol beneran èn kenyataannyé bisé dapet kekuasaaan, ampé dipikir émang gitulah nyang pastinyé bener.”

“Ancur lagéh nalar publik.”

“Haiyyyaaaaa!”

Malem tau-tau ngedeketin Subuh. Siti udé teklak-tekluk palényé. Biar Kopid Sangalas melélarajah, warung tetep bukak 24 jem. Ngladenin orang-orang kecik nyang butuh makan, bakalan tenagé nyang tetep kuat buwat perdjoeangan idoep.

“Oooaaahem,” Sukab nguap, “besuk Ruwah makan apem.”

Pondok Ranji,

Selasa, 15 Juni 2021. 05:27.

 

Be the first to leave a comment!

Leave a Reply

Your email address will not be published. Required fields are marked *