“Nyampé juga nih waktunyé mudik,” katé Dul Komprèng sembèn puter balik topi pètnyé ke belakang.

“Tapi ané nggak bakalan mudik,” saut Kaboel.

Ntu dué-dué manusiah sahur di warung nyang dijagain Yati. Émang  bener berani ntu perempuan. Nggak adé takut-takutnyé. Apé garé-garé udé dibekelin amé Babé pencak silat Cimandé? Perné ntu warung didatengin dué cecunguk nyang cari garé-garé pas warung sepi. Mangsudnyé meres, ngompas, kayak nyang minté jatah préman. Langsun ajé idung dué kuya nyang mulutnye bau miras bedaré-daré, kabur lintang-pukang nggak balik-balik lagé.

“Ané mah cuman mudik ke kampung sebelé,” katé Si Dul, “pegimané énté? Nggak bolé balik Jawé pan?”

“Bolé nggak bolé, ané émang nggak pengin balik Dul.”

“Napé?”

“Rumé ané émang di dunié Dul, nggak péngin balik ke mané-mané.”

“Sukab banget tuh!”

“Lhah kan doi emang méntor ané …”

“Méntooorr …”

“Ini serius Dul, kité idup kan émang musti punya sikap, èn sikap itu kité pertanggungjawabkeun,” ujar Kaboel serious bin cius, “mengkényé ané kagak moedix musababnyah boekan dilarang.”

“Kagak mudik pun musti adé tanggung jawabnyé yé?”

“Apé ajé musti adé tanggung jawabnyé,” katé Kaboel bari korètin sisè uduk di wadah daun pisang, “kagak gratislah idup itu, walow kité kagak minté dilairin.”

“Jadi pegimané dong tanggung jawab tuh yang nge-swèb paké antigén bekas,” Dul Komprèng abisin jugé nasinyé, lantes sebulin teh mingsih panas.

“Nah, itu satu contoh Dul, sebenernyé banyak lagi nyang laèn.”

“Nggak paké masker mingsalnyé?’’

“Yo-i!”

“Hadeuuuuhhhh, seabreg dong!”

“Seabreg-abreg!”

“Kok bisé yé?”

“Emang itu mangsalényé Dul, kok bisé?”

Itu waktu Sukab masup. Biasé, komplit amé pacul èn pengkinyé. Ngrasé rada laat saurnyé, langsun ajé kebut bin serabutan bolényé gegares.

“Olo-olooo, lagi nge-trèk kalé,” Dul Komprèng komèn.

“Itu persoalan angsalnyé di sekolé dasar,” Sukab terusin ajé ntu diskasyen anabèl.

“Pelajaran agamé mangsudnyé Kab?” Tanyé Kaboel sang follower.

“Agamé? Huh!” Sukab ngejebé.

“Napé amé agame?” Yati nyelonong ajé kayak nyang siap ngebanting.

“Kagak nape-napelahyaw! Cara ngajarinnye nyang ané sedi.”

“Bukannyé agamé itu nyang ngajarin tanggung jawab?”

“Mustinyé!”

“Tapinyé?”

“Nyang diajarin bikin ntu anak cuma peduli agaményé kendiri, pédéhél agaményé ajé nggak ngajarin kayak gitu. Mustinya berbuat baèk itu kan nggak ngeliat yang mau dibantu agaményé apé.”

“Iyé yé,” katé Dul Komprèng, “ini nyang bikin tanggung jawab ilang?”

“Mustinyé kagak.”

“Kok?”

“Lha iyé, kalow nyang satu kurang bagoes, waktu ané sekolé ès-dé adé tambelannyé tuh.”

“Apé?”

“Pelajaran boedi pekerti!”

“Kok paké ‘o-é’?” Tanya Kaboel.

“Pan djadoel!” Sukab cengèngèsan,”Kok énté bisé liat ‘o-é’-nyé, orang ané ngomongnyé lisan?”

“Itu mangsalényé Kab, kok bisé? Héhéhéhé!”

“Becandé ajé énté Boel, tahu kan pelajaran boedi pekerti?”

“Nggak ngalamin pastinya, tapi kaum djadoelers bilang itu emang hebat bingitz.”

“Jehelaaazz,” katé Sukab, “pegimané kagak haibatz, kalow sikap hidup nyang baèk, termasuk tanggung jawab sosial, bisa diajarkeun di atas semué golongan èn agamé?”

“Iyé yé.”

“Iyélahyaw!”

Pondok Ranji,

Sabtu, 1 Mei 2021. 08:10.

 

Be the first to leave a comment!

Leave a Reply

Your email address will not be published. Required fields are marked *