Baru berapé ari masup puasé, ntu roman muké mingsih jelèk-jelèk padé. Sukab nongak ke langit ngarepin mendung, biar ngelakonin puasényé rada dinginan.

“Samé ajé Kab, awal-awal puasé di Kutub tetep jugé lemes,” katé Bahlul.

Warung sengajé tetep buka, nggak paké ditutup kaén puti.

“Nggak dipakéin tutup Yat?” masup jugé Si Jali, nyang seabisnya gabung ojèk aplikasi udé susyé dipegang batang idungnyé.

“Eh, Bang Jali, nunggu order? Iyé Bang, dari dulu jugak Babé nggak perné tutup-tutupin, ‘Émang kenapé kalow nggak ditutup, jagé perasaannyé orang puasé? Alaaaahh, kalow segitu ajé mesti dijagain, pegimané kalow dapet ujian nyang bener-bener ujian?’, gitu katé Babé,” Yati nyang jugé kagak perné kerudungan, tapi ibadahnyé pol, ngejelasin.

Jali manggut-manggut.

“Babé mah jempol,” katényé, “ané jugé bilangin temen-temen ojèkers nyang bukan Muslim, ke sini ajah kalow mau nyarap apé makan siang, kecian padé bingun liat warung-warung bangkunyé dibalik.”

“Itu dié Li,” katé Bahlul, “ini kan Jakarta, campur aduklahyaw, bukan Muslim doang, nyang gitu-gitu jugé mesti dipeduliin.”

“Orang nyang Muslim kagak puasé jugé nggak kurang,” saut Jali.

“Mangsudnyé males puasé kali yé?” Muncul Kaboel nyang nyamperin Sukab.

“Belum tamtu Boel, banyak jugé nyang péngin banget puasé, tapi kagak dianjurin puasé ketimbang jadi sakit, nggak sedikit jugé itu brader kagak mungkin puasé kalow kerjaannya paké tenagé gedé,” sahut Jali, “nggak perlu kok orang mati karena puasé.”

“Emang bener nggak perlu, apélagi kalow nafkah secuil jadi kuli angkat karung, angkat batu, gali tané, pas bener bakalan idup keluargé.”

“Cuma wajib kalow kuat,” Yati ikutan pulak sembari goreng perkedèl jagung nyang sejujurnyé émang ngegodé.

“Jadi puasé ntu emang mesti adé godaannyé, kalow nggak ya sama aja bo’ong,” Sukab nyeletuk di balik masker.

Bahlul ampir ajé kelupaan mau ambil témpé.

“Iyé yé, adé nyang bilang kalow puasé kerjényé malah també kenceng supayé nggak inget laper,” katényé

“Nggak salélahyaw, tapi kan kayak ngelaba nggak sih?”

“Héhéhéhé! Biarin ajalah, pan strategi puasé masing-masing Kab.”

“Yo-i! Ané sih lebi kecian amé nyang puasényé maksa’, nyang puase cuman karena nggak enak amé tetanggé apé temen-temen sekantor.”

“Nah, itu nyang nyari warung bekaén puti Kab! Héhéhéhé!”

“Héhéhéhé!”

“Héhéhéhé!”

Mentari mingkin naèk, tapinyé bener langit jadi mendung. Sukab amé Kaboel lantes cabut bawak pacul èn pengkinyé. Bahlul amé Jali same jugé cabut pigi.

“Panggilan tugas,” katé Bahlul bari panggul doi punye karung isi obat-obat kagak jelas nyang bakal digelar.

“Untungnyé Sukab,” pikir Yati liatin langit mendung.

Mengkali ajé emang untungnyé Sukab, tapinyé belom tamtu buwat nyang laèn. Mendung nyang ngegulung-gulung item, kadang ngebentuk naga kadang ngebentuk wedhus gèmbèl, cepet ajé berubé jadi ujan angin nyang lumayan serem.

Aèr tumpé di mané-mané, nggak usyé diomongin lagi banjirnyé. Ntu jalan-jalan cakar ayam nyang nggak nyerep aèr langsun ajé jadi kali. Angin nyang bener-bener galak patahin ranting puun, terbangin atep rumé, èn sisanya abis kesèrèt banjir. Di hapé semué adé gambarnyé nyang kedengeran orang-orang padé nyebut.

Yati godèkin kepalé liatin hapényé. Untungnyé warung Mang Ayat, nyang dulu dibikinin almarhum Hasan tukang bangunan, asli kokoh.

“Ntu bukan lagi godaan,” mikirnyé Yati, “tapi ujian.”

Pondok Ranji,

Kamis, 15 April 2021. 10:14.

 

Be the first to leave a comment!

Leave a Reply

Your email address will not be published. Required fields are marked *