Deket-deket beduk Menggerib masup tuh manusiah-manusiah nyang keliatan tapran, kelaperan, èn kayaknya capèèèèèk bener ntu roman.

“Salam Mpok,” katé nyang atu dari balik maskernyé.

“Salam,” saut Yati, “nasi?”

“Nasi setengé, bolé?”

“Bolé, lauknyé?”

“Nggak usyé Mpok, nasi ajé.”

Tigé-tigényé begitu pesennyé, nasi setengé ngga paké lauk. Yati sih nggak nanyak apé-apé. Doi kasi ajé nasi setengé kali tigé. Kalow nasi atu di warung-warung emang setinggi gunung, nasi setenge mingsih dikit-dikit ngenyangin. Tapi nggak paké lauk? Kayaknya Yati belon perné denger. Emang bener nasi puti nyang pulen ntu huenax punyé, tapi masa’ sih kalow nasinyé paling huenax di dunié lantesan nggak perlu paké lauk?

Yati liatin tigé manusiah nyang gegares èn jauh-jauhan, bari sibuk ladènin antréan ojèk di luar. Atu ojèk bukannyé cumak pesen atu bungkus, paling nggak tigé, seringnyé limé, malah kadang tuju ampé lapan.

“Banyak anak kali’,” pikir Yati.

Kalow nggak the best nasi uduk in the world, ya nasi gorèng kampung pedes asin, nasi gila, apé mie gorèng. Ini belon ngomongin lauk-lauk nyang adé di situ. Empal, perkedèl jagung, témpé bacem, telor asin, telor pindang, ikan bakar, opor ayam, hmmmm, nyam-nyam. Ntu antrean ojèk adé nyang jabanin lauk doang lho! Mantep punya!

Tapi nasi setengé doang nggak paké lauk? Emangnyé anjuran diét dokter gizi? Apé ajaran bepantang bapa dukun?

“Émangnyé segitu tapran, ampé-ampé punya duit cumak cukup bakal nasi setengé, nggak paké lauk lagéh…”

“Maap Mpok, ntu sambel bolé ambil kan?”

Adé tigé sambel di tigé cobèk, sambel terasi, sambel dadak, sambel ijo. Emang gratis kalow beli ikan bakar, ayam gorèng, èn macem-macem lauk ting prentil.

“Bolé,” katé Yati nyang kagak téga.

Èh, nasi setengé nyang tinggal setengényé alias seperempat tau-tau ketumplek tigé jenis sambel. Plok-plok-plok. Putinyé nasi ampé jadi méré. Tapinyé lahap bener sekarang abang-abang ini gegares. Nggak kayak tadi nyang nelennya dipaksa-paksain.

Ntu waktu, Sukab masup dibuntutin Kaboel. Langsung Yati nanya.

“Palé ayam paké peté?”

“Yèzzzzzzz,” katé Sukab.

“Ané jugé yé?” katé Kaboel nyang dalem hal makanan pokoknyé ngikut Sukab ajé.

Srang-srèng-srang-srèng.

Abis digorèng, waktu dianter dué kepalé ayam ntu nongol kayak mingsi maunyé bekokok. Sabelonnya disosor Sukab angkat tuh palényé kayak dalang wayang kulit.

“Kukuruyuuuuuuukkk,” katényé.

“Kab!”

Sukab liat roman Yati nyang maré. Matényé ngedip, kayak mau ingetin, adé nyang kagak bisé beli lauk, walow lauk semuré palé ayam.

Sukab amé Kaboel nengok ke tigé tapranis. Tigé-tigényé kayak patung bengong liat Sukab mainin palé ayam. Sukab kendirinyé jugé bengong, liat nasi puti jadi méré amé sambel.

Lantesan beduk Menggerib, warung jadi kosong. Baliknyé Sukab liat ntu konco-konco ngibulnyé. Bahlul, Dul Komprèng, Jali, nyang carényé gegares kayak nyang mau telen semué nyang adé di situ.

“Ntu orang-orang makan cumak paké sambel, tigé jenis sambel, ampé nasinyé méré semué,” katé Sukab, “pesen nasinyé setengé lagéh. Mangsudnyé ngirit gitu? Kecian bener.”

Temen-temennyé tawé ngakak.

“Orang kismin kecian amé orang kismin mangsudnyé?” katé Bahlul.

“Lho, emang nggak perlu yé?”

“Setengé nasi pulen amé tigé sambelnyé Yati mah kemewahan atuh …,” ujarnyé Dul Komprèng.

“Adé nyang nasinyé pera kayak plastik,” kata Jali.

“Adé nyang lauknyé garem ajé,” katé Bahlul.

“Adé nyang seharian belon tangtu bisé makan,” katé Dul Komprèng lagéh, “émang enté udé segitu kayényé ampé lupé yé?”

Sukab nyengir, kayak lelawa penular Kopid.

Pondok Ranji,

Minggu, 14 Februari 2021. 17:20.

 

Be the first to leave a comment!

Leave a Reply

Your email address will not be published. Required fields are marked *