“Capééé dèh!” Sukab gèlèng-gèlèng kepalé.

“Napé Kab?” Kaboel ngejentul di warung nyang mingsi sepi. Geli juga liatin Sukab kayak orang prihatin, “soal ntu dué mentri? Semué orang jugé empetlah, bukan énté ajé.”

“Bukannyé gitu Boel,” katé Sukab, “mau limé apé tuju mentri korupsi bareng-bareng jugé ané nggak bakalan kagèt …”

“Jadi apè dong nyang bikin ntu pale gèlèng-gèlèng kayak loro blonyo?”

Sukab banting kopiahnyé ke meja.

“Ini komplotan Boel!”

“Komplotan?”

“Yo-i! Komplotan!”

“Komplotan pegimané Kab? Komplotan dué mentri?”

Sukab paké lagi ntu kopiah belèl.

“Énté pikir ntu mentri siaul cuman ngayal ajé kalow doi bisé embat koper-koper isi duit?”

“Ngayal?”

“Yo-i! Mikir kendiri pagimanah nilep duit kertas, masukin koper, trus diumpetin.”

“Nggaklahyauw! Mesti adé nyang kasi idé, gagasan, akal bulus, carényé pegimané gitu kan?”

“Nah, adé komplotan, iyé nggak Boel?”

“Iyé yé, si mentri bossnyé?”

“Justru ini nyang bikin palé gèlèng-gèlèng Boel, bisé ajé mentri-mentri méhong ntu diselundupin masuk kabinèt emang bakal nyedot dana!”

“Itu mah teori konspirasi Kab, anabèl, analisis-gèmbèl.”

“Eh, kalow ané kepédéan bilang ntu dué-dué tikus mentri jadi atu komplotan, bolélah dibilang teori konspirasi, tapinyé kalow ané bilang ntu mentri kagak ngayal kendiri mikirin berapé duit mau ditilep, masukin koper èn diumpetin, nggak keléwat anabèllah Boel! Nyolong kayak gitu sendirian? Nyang bener ajé!”

Subuh begerimis jadi anget di warung. Siti nyang tadinyé udé ngantuk abis jadi melèk èn nimbrung.

“Atu mentri atu komplotan, dué mentri dué komplotan dong,” ujar Siti bari benerin kerudungnyé.

“Inget lagi dèh kok bisé jadi mentri,” katé Kaboel.

“Tuh, mingsi anabèl kagak? Ané gèlèng-gèlèng bayangin kalow adényé atu tikus same ajé adényé atu komplotan penggangsiran, ntu dana negaré kan kayak kesedot abis kagak adé juntrungannyé,” katé Sukab.

“Hmm, nyang soal juntrungan, kayaknya nggak gitu dèh,” Siti emang bener-bener melèk, “ketangkep ka-pé-ka kan? Ntu nyang dilacak kan jalur duit, dikeluarin segini kok nyang keliatan cuman segitu? Ilang ke mané? Kan gitu!”

“Oké ajé Sit, itu belon gugurin proposisi ané, atu tikus samé dengen satu komplotan.”

“Nanggung amat proposisi kayak gétu, sekalian ajé jejaring tikus, tantangan pembongkaran ka-pé-ka.”

“Wah Siti, bolé jugé tuh, diajarin almarhum Hasan yé?” Kaboel nyeletuk.

Nyolot dah Siti.

“Maknyédikipé! Emang prempuan nggak bisé blajar kendiri ?! Ané pan punyé hapé! Isinyé kalow cuman kepinteran sepulu palé énté ajé lebi Boel!”

“Ampun Mpok! Ampun Mpok!” Si Kaboel nyang nyadar nyemba-nyemba.

“Mpak-mpok-mpak-mpok,” Siti ngomèl bari siapin lontong sayur, “pagi-pagi cari setori, Hasan pulak dibawak-bawak.”

Kaboel nyungsep ajé maunyé, tapinyé ke mane? Mau kluwar tau-tau ujan deres. Untung Sukab mingsi ngomong lagi.

“Kalow ané bilang ntu komplotan punyé mau politis, ntu baru anabèl, ané bilang sih ini bener-bener tikus,” katényé, “tapi kalow setingkat mentri cuman anggota komplotan, apé nggak lumayan gedé ntu rombongan  pancalongok?”

Bahlul, nyang begitu muncul udé basa kuyup, sempet jugé denger.

“Siapé Kab?”

“Siapé apé Lul?”

“Bossnyé tikus mentri.”

“Taulahyauw, tikus wirog kali’…”

Pondok Ranji,

Selasa, 15 Desember 2020. 18:26.

 

Be the first to leave a comment!

Leave a Reply

Your email address will not be published. Required fields are marked *