Bari nerusin nyangkul galian di pinggir jalan, nyang Sukab nggak keléwat jelas bakal apé, begosip jugé doi lantaran gemes amé ntu pekaré.

“Baru kemarèn jadi menteri, èh ini ari udé ditangkep kapéka, kebayang nggak tuh!”

“Héhé, mingsih jèt-lèg tuuuhhh …,” di belakangnyé nyangkul jugé Si Kaboel. Ntu dué manusiah udé kayak mandi lumpur ajé. Walow nggak paké masker, samé ajé mukényé kagak keliatan. Mandornyé sih paké. Mondar-mandir paké sepatu but èn rompi oranye manyala. Diem ajé denger orang kerjé bari ngomong.

“Nyang penting kan tetep nyangkul,” pikir si mandor, “orang kecil begitu biarinlah bebas ngomong, apélagi ari-ari idup semangkin susyé begini.”

Alih-alih ngingetin, doi malahan nguping.

“Bininyé jugé ditangkep mèn,” katé Kaboel, nyang paké kaos selipun lusuh adé tulisannyé Hard Rock Café Ciledug.

“Kebayang kagak tuh Boel,” saut Sukab lagi, “laki bini ditangkepnyé! Komplotan kali’”

“Héhéhéhé! Doi bilang kecelakaan lagéh!”

“Mangsudnyé kecelakaan gimané ntu Boel? Nggak sengajé korupsi gétu? Atawé pagimanah?”

“Tau juga tuh, kali-kali’ biasényé nggak ketauan, tapinyé sekarang ketauan.”

“Huuuuhhh, kecelakaan! Enak ajé! Dari nyang diblanjain di Amrik, ketauan banget pegimané jabatan cumak dianggep kesempetan ngambil duit!”

“Menteri ajé begitu, pegimané tikus-tikus nyang nggak keliatan tapi buanyak?”

Sukab brenti nyangkulnyé, lurusin ntu pinggang nyang sedari tadi ngebungkuk, bebalik ke Kaboel nyang mingsi terus nyangkul.

“Ntu manusiah bolé ajé nggak tau malu Boel, paling nggak mukényé di dalem sèl, tapi pegimané narok muké ini bangsé di dunié?”

“Kok?”

“Ntu menteri baru, kalow kepilih èn diangkat jadi menteri, udé barang tentu pura-puranya orang pilihan kan?”

“Yo-i!”

“Nah! Itu dié! Kalow orang pilihan ajé kayak gitu, pegimané nyang laèn-laèn? Iya kan?”

“Enggaklah!”

“Enggak nyang pegimané?”

Kaboel jadi brenti nyangkoel èn siap kasi argumèn, tapinyé ntu mandor liatin taringnyé.

“Hoooiii! Jagoan-jagoan anabèl! Nggak dilarang ngomong, brenti kerjé jangan yakh!” Katényé sabelonnya pigi ngider.

Cepet ajé dué pendékar cangkul èn pengki ini ngebungkuk macul di dalem galian.

“Sssstt!” Kaboel bebisik, “Anabèl apaan?”

“Belon tau énté Boel? Analisis gèmbèl! Héhéhéhé!”

Kaboel semangkin kenceng ajé maculnyé.

“Cobak denger Kab, gèmbèl apè kagak analisis ané yé?”

“Siap!”

“Huss! Siap-siap kayak militer ajé,” Kaboel sebel, “ané nggak setuju énté bilang menteri itu pastinyé orang pilihan, soalnyé kursi-kursi menteri ntu jadi bagian tuker guling Kab.”

“Tuker guling nyang pegimané?”

“Kalow énté bantuin menang pemilu, énté dapet kursi,” katé Kaboel, “kalow énté kalah èn bisé ajé suka ribut, supayé diem énté dapet kursi.”

“Lha ini nyang mané?”

“Nyang belakanganlah modèlnyé, kayak orang meres dèh jadinyé, èn nyang ditarok di situ bisé siapé ajé, nggak usyé orang pilihan biar bakalan menteri jugak.”

“Kalow nggak orang pilihan, orang nyang pegimané dong, apé mesti doi kendiri?”

“Nggak mestilah, apélagi kalow doi udé dapet jugé kursi nyang laèn, bisé temennyé, bisé sopirnyé …”

“Haaah? Sopirnyé?!”

“Nggak mesti sopirlah, préman juga bisé, pokoknyé kursi menteri itu jatahnya bakal siapé ajé nyang punyé jasé amé énté.”

Lewat lagi dèh mandor tadi.

“Analisisnyé bagus,” katényé, “sayangnyé kalian tetep ajé gèmbèl.”

Pondok Ranji,

Senin, 30 November 2020. 18:58.

 

Be the first to leave a comment!

Leave a Reply

Your email address will not be published. Required fields are marked *