“Inget bener dèh ntu dongèng guru ès-dé,” katé Sukab bari copot maskernyé buat sruputin kupi.

Warung udé ramé dari Subuh, walow nyang naményé ramé haré géné artinyé cumak isi 50%,  garé-garé kuwajiban ngejagé jarak, bakal ngamanin sesamé manusiah dari samberan Kopid.

“Émang énté perné sekolé Kab?” Dul Komprèng nyeletuk

“Émang banyak nyang malsu ijazah ès-dé?”

“Bukan gitu, tapinyé kité émang nggak perné tau, énté ntu sebenernyé perné sekolé apé kagak.”

“Nggak penting kan? Nyang jelas guru-guru ès-dé ané émang pinter-pinter ….”

“Pinter ngedongèng mangsudnyé?”

Sukab jadi serius, bebalik ngadepin Dul Komprèng nyang baru gegares bubur ayamnyé Siti.

“Énté ngomong kayak dongèng ntu kagak sepenting matematik, ilmu alam, ilmu ekonomi, atawa ilmu agamé,” ujarnyé, “énté salah Dul, èn kalow bangsé kité nyepéléin ilmu-ilmu kayak ilmu bahasé, nyang dongèng adé di dalemnyé, jadinyé bisé amburadul Dul. Ilmu nyang bisé ngebacé apé nyang salah apé nyang bener kan ilmu ngerti bahasé, iyé nggak Dul?”

Si Dul, ngerasé rada kurang modal ngeladènin pekaré beginian, langsun ngelès.

“Iyé, iyé dèh Kab, dongèng apè nyang énté bilang inget tuh?”

Sukab udé nyengir kambing sabelonnyè ngejawab.

“Héhéhéhé, kodok nyang péngin jadi kerbo, héhéhéhé!”

“Katak hendak jadi lembu mangsudnyé?”

“Kecakepan Dul! Kodok mau jadi kerbo ajé! Hahahahaha!”

“Lhah, Kab, kok ketawé mulu? Emangnyé ntu bukannyé dongèng sedi yè, adé kodok liat kebo, lantes ngerasé doi bisé samé gedé, doi gedein dah ntu perut buncit seuprit, èh ampé meledug loh ntu perut! Pan kecian,” katé Dul bari order kupi, “pigung atu Sit!”

“Pigang-pigung apaan?” Siti bingung.

“Kupi jagunglahyaw! Héhéhéhé! Kréatip dikit dong jadi manusiah! Nah, napé énté alih-alih ketawé Kab amé ntu dongèng perut meledug?”

Sukab nyang udé abis uduk èn kupinyé pasang lagi ntu masker.

“Ané geli ajé adé orang nggak ngerasé dirinyé kodok,” katényé, “apé guru ès-dényé dulu kagak dongèngin yè?”

“Èh, nyangkut orang nih? Siopak?”

“Siopak-siapuy ajé énté Dul, poré-poré nggak tau apé pegimané?”

Dul sruputin kupi jagungnyé.

“Bener Kab, gelap.”

“Di depan maté loh!”

“Wueitz! Di depan maté? Ané buté apé yé?”

“Bukan buté, tapinyé dibutain Dul.”

“Wueitz lagi dèh! Kok jadi serem. Dibutain pegimané Kab?”

“Dibutain amé ilmu sunglap, ilmu kibul politik, tricks bilangnyé.”

“Nggak ngertilah ènggris-ènggris gitu ané Kab …”

“Jehelaz bingitz kok Dul, ya kejadiannyé, ya ilmu kibulnyé.”

“Ilmu kodok?”

“Kalow doi ngibul, ya doi bukan kodok, tapi tetep ajé kibulnya bégo,” katé Sukab, “nah kalow doi kemakan kibulnyé kendiri, èn ngerasé bisé jadi dinosaturnus, ntu perut buncit seuprit bener-bener bakal meledug Dul.”

“Kodok bégo? Siape?”

Masup lagi orang-orang. Bahlul tukang obat, Jali tukang ojek beraplikasi, Kaboel pekerja serabutan nyang ngerjain apé ajé asal nggak nyolong, Yati nyang mau tukeran jagé warung amé Siti jandé Hasan.

“Pan kité-kité nyang cumak lulus ès-dé ajé bisé ngerti kibulnyé Dul, gampang kebacé, artinyé nyang ngibul kebegoanlahyaw!” Kaboel nyang udé denger omongan kayak gini di warung-warung laèn langsun nyaut.

“Iyé Dul, énté poré-poré ajé kali’, jeri beropini takutnyé adé nyang nggak sukak gitu?” Bahlul nambahin.

Jali sih langsun nyodok.

“Dul, kalow adé nyang maksa’ bisé ngeyakinin punyé pengikut paling banyak se-Indonesia, dengen ngerahin massa nyang sebanyak-banyaknya cumak sebandara lebi dikit, apé nggak meledug perut ntu kodok nyang mau jadi kerbo?”

Si Dul nyengir bajing di balik masker.

“Oooohh, bilang dari tadi kèk kodok berjanggut gétuuuhhh.”

Di balik masker, udé jehelaz nyengir semué padé.

Pondok Aren,

Minggu 15 November 2020. 07:06.

 

Be the first to leave a comment!

Leave a Reply

Your email address will not be published. Required fields are marked *