Pagi-pagi Jali nongol di warung paké motorpitnyé nyang udé sahih ngojèk aplikasi.

“Tumbèn nih Bang Jali,” katé Siti, jandé Si Hasan nyang bantuin Yati, disebalik maskernyé, “kupi Bang?”

“Yo-i, uduknyé jugé dong.”

Ditaroklah pakèt bungkusan uduk pakè daon pisang edisi istimewa, nyang didalemnyé udé adé telor dadar mangah-mangah. Jali cepet bukak maskernyé.

“Asyeeeekkk,” katé Si Jali bari mulaiin nyarap, “haré géné udé semustinyé ucapin syukur, bisé bahagié nggak paké maksa’.”

“Siapé nyang maksa’ Bang?” Siti susulin kopi jagungnyé.

“O-rang-o-rang-men-de-he-ri-ta …,” Jali tiruin orang maèn téater.

Mangsud Jali pastilah manusiah-manusiah nyang nyumpegin Puncak, Malioboro, macetin gerbang tol, mbeludak ke tempat hiburan, èn ujung-ujungnyé ngledakin Kopid, matiin orang-orang …

“Sèntimèntil ….” Sukab nongol langsun nyaut, “nggak tahan menderité, pédéhél pan di rumé kendiri.”

“Nggak adé orang nyang lebi menderité timbang orang nyang menderité di rumé kendiri,” celetuk Bahlul nyang tau-tau udé mojok,” nasi atu Sit!”

Empetnyé Sukab udé ampé lèhèr.

“Liatin dokter-dokter padé teréak, kalow kejet-kejet siapé nyang musti tulungin? Udé berapé dokter nyang gugur? Orang-orang ni maunyé tau bèrès ajè. Ari libur panjang bukannyé diajak omong kèk organisasi dokternyé, ditanya kèk aman apé kagak ngebeludakin orang di mané-mané kayak gini. Eropa ajé lokdaun sebulan. Emangnyé di kité lebi aman? Nyang bener ajé!”

“Kan komunikasi emang simpang siur Kab, udé kagak tau lagi siapé nyang pantes didengerin,” saut Dul Komprèng kernèt mikrolèt nyang masup paké anduk dikuduknyé.

“Mengkényé kalow semué orang ngaco, kendirinyé jangan,” Jali cepet banget abisin uduknyé, “madatan amat sih amé hiburan, kayak nyang kagak perné diajarin prihatin …”

“Emangnyé kité punyé budayé prihatin?” Sinis bener Si Sukab.

“Lha itu, kebatinan, yoga, majlis ta’lim de-èl-èl, nyang mustinyé ngelatih kemampuan menahan diri pan bejibun.”

Sukab ulurin doi punyé lidé, kayak monyèt dicekèk.

“Menahan diri? Menahan diri apaan? Dipancing masuk jurusan makar ajé guampang bangetz, kayak ikan kegiring masup bubu.”

“Tinggal digorèng dèh,” Bahlul komèn bari nyarap.

“Huss! Ini nggak maèn-maèn Lul,” katé Sukab, “Si Kopid ni bisé matengin suasané orang ngamuk. Tinggal amukannyé ditunggangin akal bulus makar.”

“Wueitz! Siapé bulusnye Kab? Pinter bener akal-akalannyé yé?”

“Pinter-pinter bodolah!”

“Lho kok paké bodo?”

“Kalow pinter ya udé kasil duonk, kagak kentaré, èn nggak usyé ngacir ilang dari ruményé!”

“Pan keluwar negeri katényé …”

“Lu pikir doi? Bukan ané nyang ngomong yé! Mau makar samé ajé, musti tunggu atawé bikin situasi mateng, nggak grabak-grubuk ngandelin anak-anak kecil nyang mau belajar jadi préman. Baguslah nggak jadi apé-apé, malah mangkin ketauan belangnyé.”

“Lha, Kopidnyé? Pan tetep ajé meledug, démo rapet begicu!”

“Itu dié! Émangnyé terus doi mau nanggung?”

Yati dateng, bakal gantiin Siti nyang begadang semaleman. Ngakalin dayé tampung warung nyang jadi seuprit garé-garé Kopid, jam bukanyé dibikin pol 24 jem.

“Aduuuhh  abang-abang, nyang diskas udé ampé makar ajé nih,” katé Yati, “sabelon pigi simpulin dulu yé?”

“Nyang ngebet hiburan amé kebelet makar samé-samé nggak terlatih prihatin, nggak mampu nahan diri,” katé Jali, bari cengklakin motorpitnyé nyamber order.

0% prihatin, ntu dié simpulannyé.

Pondok Ranji,

Minggu, 1 November 2020. 08:49.

 

Be the first to leave a comment!

Leave a Reply

Your email address will not be published. Required fields are marked *