Selipun terancem Kopid, pagi-pagi udé penu ajé ntu warung amé orang ngelebok bubur ayamnyé Yati.

“Bubur panas begini kecemplungan droplèt koit nggak Si Kopid?”

Bahlul nanyak sembari mangap, gegares bubur seséndok nyang masup mulutnyé.

“Koitlah kalow bener-bener puanas Lul,” sahut Jali nyang udé gabung amé perusahaan ojol, bikin doi bener-bener sibuk binti hiruk-pikuk nganterin pesenan ke sono-sini.

“Mengkényé makan bubur ya fanas-fanas,” ujar Dul Komprèng nyang baru tiupin bubur ngebul di sèndoknyé.

“Kalow panas banget ya mèlèr dong ntu lidah,” katé Kaboel. Semangkin sering ajé doi nongol di warung, kagak jagé warung ngegantiin Sukab, melaènkeun cumak bakal gegares. Mulai nyarep ampé maghrib gegares di warung mulu, penandé udé dapet order harian lagéh, èn proyèknyé deket-deket ajé di deket warung.

“Nggak mesti panas seratus derajat Celsius dong nelennyé,” Yati setengé khèki jugé buburnyé dibawé-bawé ke jurusan lidah mèlèr, “ntar bisé pulang besar jugé garé-garé bubur.”

Masup Siti jandényé Hasan nyang kerjé amé Rohayah.

“Mpok Rohayah minté dibungkusin,” katényé.

“Satu ajé?”

“Selusin Nèng.”

“Selusin? Duabelas mangsudnyé?”

“Iya Nèng, duabelas.”

“Banyak amir?”

“Boss-bossnyé jugé katényé Nèng.”

“Wuiihh! Kerajinan bener boss-bossnyé sepagi géné?”

“Rapat penting katényé,” katé Siti.

Yati geli ajé kalow inget Siti dué minggu lalu nongol di warung bawé orok Si Hasan bari nangis uhuk-uhuk. Karang udé gumbiré bin hèpi ajé kayaknyé. Paling laat nongol léwat subuh, kayak nyang bayar keberuntungannyé dapet kerjaan dengen kerjé nyang keras.

“Gilé bener jandényé Hasan,” Rohayah perne bilang, “bagus bener kerjényé, dari subuh ampé magrib kagak brenti-brenti, kayak nggak punyé udel. Yah, kerjé emang musti begitu sih, cumak banyak kan nyang nggak tau diri èn kagak besyukur punyé kerjaan. Hari géné orang dipecatin, perusahaan ambruk, usahé tutup, èh nyang mingsi kerjé seénak perut ajé kerjé, nggak nyadar nyang kayak gitu same jugé bikin bèngkrap.”

“Bèngkrap? Bangkrut mangsudnyé?”

“Yo-i! Boss-boss ntu bilangnyé bèngkrap.”

Yati kagak komèn, smailinyé disimpen dalem ati.

“Kali’ nyang kayak gini bikin Batavia jadi Betawi,” pikirnyé.

“Rapat soal pabrik nyang bakalan bèngkrap,” Siti nyang kagak ditanya nyodok waktu duabelas bungkus bubur ayam ntu udé klaar.

Seabisnyé Siti keluar Yati jadi mikir. Kalow boss-bossnya ini ari kagak We-Ep-Ha, pastinyé ajé adé nyang penting ampé brani-braninye nyebrangin semesta Kopid nyang karang katényé èrboren, atawa bisé nemplok seabisnyé ngelayang di udaré, dari orang nyang bangkis atawa batuk di mané-mané.

“Napé Yat?”

Sukab nyang baru masup emang papasan amé Siti, liat romannyé nyang gumbiré, doi udé lame nauin kerajinan Siti kerjé, tapinyé laèn bener amé roman Yati nyang setengé prihatin.

“Siti nggak kené PHK kan? Baru jugé magang.”

“Enggaklah. Siti kagak tau …”

“Kagak tau apé?”

“Pagi-pagi Rohayah pesen duabelas mangkok bubur, dibungkus, bakal boss-bossnyé nyang rapat darurat, ampé musti masup kantor. Siti lugu ajé denger rapatnyé soal perusahaan nyang bakal bèngkrap.”

Sukab diem bentar.

“Bèngkrap ntu bangkrut kan?”

“Yo-i,” jawab Yati, “Siti belon nyadar, kalow perusahaan beneran bangkrut, Rohayah nggak punya kerjaan lagi, èn doi kendiri ya ikut nganggur.”

Sukab ngeliat Bahlul, Jali, Dul Komprèng, èn Kaboel nyang berjuang nelen bubur pas lagi panas-panasnyé, asal lidahnyé kagak jadi mèlèr, walow tetep ajé ntu roman-roman muké keliatan ngeres.

“Belakangan sih sering denger …,” katényé.

“Denger apé?”

“Orang ngomong bèngkrap-bèngkrap gitu,” sambungnyé dengen roman susyé.

Pondok Ranji,

Sabtu, 15 Agustus 2020. 13:43.

 

Be the first to leave a comment!

Leave a Reply

Your email address will not be published. Required fields are marked *