Ini ari sibuk bener Yati bulak-balik. Ntu segalé dandang, bakul nasi, gelas piring, èn tau apé lagi masup warung.

“Èh, mau bukak lagi? Pan mingsih adé nyang lamé ané jagain di sini,” katé Sukab.
“Nyang lamé garé-garé kagak perné dipaké bebulan-bulan udé kayak barang loak,” katé Yati, “belon tau lagi apé kagak adé droplèt ngendon di situh.”

“Mané bolé jadi Yat, pan ari-ari ané semprotin disinpektan, udé klengerlah ntu droplèt méhong.”

“Iyé, koit atu dateng seribu!”

“Huss! Nggak adé matinyé?”

“Anggep ajé temenlah Kab, orang ntu Si Kopid di mané-mané …”

“Apé jugé ané bilang, nggak usyé ngimpi jaman normal bakalan balik …”

“Naményé normal baru, ya baru dèh.”

Sukab bukak kopiahnyé lantes usep-usep rambut, gèlèng-gèlèng kepalé bayangin dunié berubé garé-garé tanpé kecuali semué orang paké masker kayak ninja. Apé katé ninja nyang beneran yé? Sukab nanyé ke dalem atinyé kendiri, pegimané orang kayak Paimo nyang bener-bener kagak bisé ngerti kenapé dunié kudu berubé nanggepin ini semué.

“Nyang dikasi modal nggak paké bunga pan nyang udé usaha,” katé Paimo, “nyang dari sononyé pengangguran masa’ dikasi modal, iya kan? Itu mah buang duit! Mestinya pemerintah nerusin proyek nyang gedé-gedé, nyang butu tenaga kasar kayak ané buanyak-banyak, jangan malah brenti. Mati ajé dèh kité-kité. Iyé nggak Kab?”

“Lhah ketimbang énté koit dipatil Si Kopid ?”

“Oalah Kab, ari-ari kité jugak idup-mati kan? Setengé idup setengé mati, apé nggak lebi baèk mati ajé? Ngurang-ngurangin beban idup pemerintahlah.”

“Huss! Nggak bolé gitu mikirnyé Mo! Cacing ajé nglawan kalow diinjek, énté dapet sembako bansos mingsi ajé nyap-nyap.”

“Bukannyé nyap-nyap Kab, tapi ngapain piaré gentong nasi cobak? Belon tamtu manusiah-manusiah kéré unyik ntu tèngsin terimé bansos loh, bukannyé nggak adé nyang sengajé dilama-lain nganggurnyé bakal sembako seumur idup.”

“Hwaduuuhhh …”

“Usulan ané pan bagus, bikin proyèk gedé nyang bisé jadi komprèngsasi …”

“Apaan tuh komprèngsasi? Masih apényé Dul Komprèng?”

“Si Kopid bikin ilang duit, proyek gede bikin duit dateng lagi, gitu kan mangsudnyé?”

“Ooohh, kompènsasi …. terus? Mau segedé apé proyèknyé nyang nampung semué penganggur dampak Si Kopid?”

“Segedé Tembok Besar Tiongkok lah, berpulu taon tapi nggak paké dicambuk.”

“Lhah Tol Trans Jawawul udé jadi tuh. Rel kereta api di Papua mangsudnyé? Pan udé adé nyang ngerjain èn kayaknya nggak kurang.”

“Proyèk ibukoté nyang baru kan adé! Jadiin ajé! Ngapain dibatalin segalé! Kerahin semué rakyat paling miskin se-Indonesia ke sono, nyang penganggur akibat Kopid sekalian penganggur asli, jadi bèrès kan soal pengangguran. Sembako buat penganggur ntu yang bener-bener nggak mampu kerja walow dikasih kerjaan ajé. Nyang mbangun ibukoté pan dikasih UMR jugé udé slamet. Kalow pemerintah nggak punya duit bayar makan juga bolèh. Pemerintah bantu kité, kité bantu pemerintah, gitu kan? Itu baru gotong royong! Soal Kopid? Yah, kalow protokol dimandorin nyang  bener nggak adé nyang kepatil dèh!”

“Mo, ibukoté baru dibikinnyé kan nggak bisé sak-deg-sak-nyet, mesti adé banyak peralatan berat, ngumpulin ahli èn macem-macem lagi.”

“Aaahhh alesan ajé! Emang Tembok Besar Tiongkok, Borobudur, Prambanan dibangun paké bulldozer, traktor, katrol, katrok èn nggak tau apélagi! Udahlah, kasih proyéknyé ke rakyat, nggak usah méwah-méwah ibukotényé. Kalow rakyat Majapahit bisé ngebangun Trowulan paké tangan, napé kité jaman sekarang kagak bisé? Monyèt-monyèt ajé bisé bikin Tambak Situ Bandalayu paké batu ditumpuk-tumpuk di laut dari India ampé Srilanka dalem Ramayana.

Sukab jadi cengèngèsan kendiri.

“Ini dampak Kopid,” pikirnyé, “adé nyang takut mati, adé nyang berani idup, walow rada-rada ngawur …”

Pondok Ranji,

Minggu, 31 Mei 2020. 11:21.

 

Be the first to leave a comment!

Leave a Reply

Your email address will not be published. Required fields are marked *