Tau udé berapé minggu warung tutup. Sukab nyang ari-ari kagak perné nggak ngomong atinyé serasé sunyi beratz. Biar kagak jadi sèdèng, Sukab ngelamun bin berkhayal, kalow-kalow adé cerité nyang kayak begini garé-garé si virus méhong:

Malékat Maut A (MM-A) amé Malékat Maut B (MM-B) nyang udé kecapèkan cabutin nyawé orang di seantero bumi, télé-télé di atasnyé awan nyang kayak kasur empuks walow kagak adé punyé pir.

“Tangan pegel jugé yé nggak abis-abisnyé cabutin nyawé orang …”

“Yo-i! Apélagi nyang banyak dosé, huuuuhhhh, itu nyawé kayak adé nyang mégangin, kagak réla bangetz udé waktunyé matèk.”

“Musti ngedhen nariknyé yé?”

“Ngedhen bangetzlahyaw, mané buanyax lagé, ampé nggak bisé napas …”

“Héhéhéhé! Malékat nggak bisé napas bolényé bisé matèk nggak yé?”

“Kayaknya nggak paké matèk dèh Malékat, lagian pan musti adé nyang nyabutin tuh nyawé-nyawé nyang belakangan udé didaptar matèk amé Si Korce.”

“Korca-korce, pirus nyakitin begicu énté Belandéin buat apé?”

“Korona jugak kebaguseunlah.”

“Kopid gitu kèk, hilmiah dikit, Kopid-19.”

“Émang adé Kopid-1, 2, 3 ampé 18?”

“Tau dèh apé émang ngantré urut begicu, emang ané pikirin?”

“Perlu jugalah Malékat tau urusan manusiah, boringlahyaw nyabutin nyawé mulu.”

“Iyé jugé yé, lagian nyang matèk sedunié, Malékat Maut-nyé cumak dué, tèlèrlahyaw, emang Malèkat-malèkat laèn kagak bisé bantuin yé?”

“Huss! Malèkat-malèkat jugak pan udé tugasnyé kendiri-kendiri!”

“Bolé ajé tugas kendiri-kendiri, tapi nyang adil dong, masa’ adé Malékat nyang tugasnyé nggak nyampé-nyampé.”

“Nggak nyampé-nyampé? Mangsudnyé?”

“Pan adé ntu nyang tugasnyé niup terompet seabisnyé kiamat, yaaaah kapan kiamatnyé? Sabelonnyé kiamat dateng pan bisé bantuin kite?”

“Hmmm, kerjé doi sih samé ajé beratnyé amé kité.”

“Adé lagi dèh! Kerjé cumak niup terompet atu kali mané sebanding amé nyabutin nyawé orang-orang nyang sehari ajé udé berapé, udé dué jutaan també cepèk taon lagé!”

“Lhah, semué nyang kité matiin pan musti doi idupun lagé!”

“Termasuk homo habilis nyang belon tau mané salé mané bener?”

“Dari manusiah nomor urut atu-lah! Percis ajah banyaknyé! Ntu sebanding naményé!”

Ampé di sini Sukab batuk. Walow nggak adé orang di warung nyang tutup, Sukab tetep pasang maskernyé.

“Bisa ajé énté,” Doi terusin lagi karangan di kepalényé, “Eh, ngomong-ngomong, apé mangsudnyé matiin manusiah musti paké Si Kopid, apé nggak bisé biasé-biasé ajé nyang kagak usyé paké ribet kayak begini yé?”

“Mangsudnyé mah ané kagak ngarti, apé musti paké mangsud adényé Si Kopid ini, tapi nggak usyé nunggu jawab bisa ajé kan mikir kendiri apé nyang salé sabelonnyé, èn apè nyang kudu dibenerin supayé Si Kopid nggak cumak ilang, tapinyé kejamin nggak bakal dateng lagi.”

“Apé dong nyang dipikir?”

“Yaaahh kok ke ané, nanyaknya ke sono noh!” Bari ntu Malékat Maut A nunjuk ke bumi.

“Apé bisé yé, ntar soal ngindarin wabah kayak gini, jadi prioritas nomer atu?”

“Nggak mentingin politik, ideologi, ekonomi, èn apapun, pokoknyé nggak musuhan, nggak saingan, nggak musti adé nyang menang-menangan so musti ngalahin nyang laèn?”

“Yo-i.”

“Kalow mau slamet, ya prioriotas cumak atu: Kesehatan Manusiah di Bumi.”

“Di akhirat kagak?”

“Hiiiihhhh, nggak usyé gitu-gitu banget kenapé siiiihhhh …”

“Banyak nyang musti berubé dong, apé bisé? Manusiah serba sontoloyo kayak gini?”

“Ooooh ya terserah ajé kalow nyang ini nggak bakal jadi pelajaran …”

“Napé émang?”

“Ya belon tamtu Si Kopid ajé nyang bakal balik …”

“Amé siapé dong?”

“Kali-kali’ Kopid-20, nyang lebi serem, lebi kejem, lebih celutak nyamber siapé ajé nyang nggak nomer satuin kesehatan, tapi kepalényé cumak mikir atu perkaré: ini ari bisé ngelabé apé, apé, èn apé …”

Pondok Ranji,

Kamis, 16 April 2020. 14:00.

 

Be the first to leave a comment!

Leave a Reply

Your email address will not be published. Required fields are marked *