Selipun menusié di kiri-kanan kayak nyang bakal kojor kalow kagak taun baruan, Sukab tetep hoasyik omongin mangsalah nyang dianggepnyé cius beratz. Apaan tuh? Apé lagi kalow bukannyé pengakuan ajaib orang nyang nyirem aèr keras.

“Emang napé Kab? Bagus ajé kan pelakunyé ngaku?”

Jali, tukang ojek non-aplikasi masih ajé nangkring di warung. Malem udé jau, selaèn Jali, cumak Sukab amé Mang Ayat ajé nyang adé di situ.

“Mikir dong Li, mikir,” ujar Sukab bari ketok-ketok jidatnyé kendiri paké ujung jari, “émang kenapé nggak adé angin nggak adé ujan kok terus ngaku?”

“Insap kali’,” celetuk Mang Ayat bari ngencengin radio pas lagu dangdutnyé rasa seronok.

“Haaaahhh? Innnn-sap?” Palé Sukab begoyang-goyang, “Haré géné adé menusié insap? Kalow poré-poré insap mah percados Bé.”

“Jadi pegimanah hanalisisnyé Kab?” Jali nyeruput kopi jagung.

Sukab pun banting kopiahnyé kayak maén gaplé.

“Taroklah doi insap èn jujur,” katényé, “tetep ajé itu komplotan kan? Adé nyang ngerancang, ngebagi tugas, ngawasin, ngétung jadwal, mastiin kapan nyang diincer kluar masup rumah, masjid, ataw kantornyé. Komplotan, bukannyé doi sorangan. Belon lagé siapé nyang nduitin, èèèèènnnn, nyang paling penting … kok doi brani? Ha? Kok brani?”

“Brani ngaku?”

“Bukaaannn, payé dah énté, kok brani nyirem itu lho!”

“Napé dong?”

“Yah adé bèkkkiiiiiiiingngng … Tau kan mangsudnyé!”

Jali manggut-manggut bari ngelus dagunyé nyang klimis.

“Hmmm, jadi brani ngakunyé gitu jugak kan?”

“Jehelaslahyaw! Ntu orang-orang pan cumak pion, robot, ataw kudé …”

Mang Ayat nyang lagi cemplungin pisang kepok ke wajan nyeletuk lagi.

“Èh, kok kudé Kab?”

“Héhé, nyang dipasangin kacématé mangsudnyé!”

“Kacématé kudé?”

“Yo-i!”

Suarényé pisang digoreng malem-malem dingin begitu bikin ngiler ajé. Babé sérok semuényé lantes tarok di piring sèng.

“Cobak dèh Bé,” Sukab nerusin, “dari kejadian nyiremin ntu aèr keras, pan udé penu amé nyang serba ajaib …”

“Adé nyang ditutupin gitu yé?”

“Nnnahhh! Itu nyang ané mau bilang Bé!”

“Pélagé nyang sekarang pan Kab?” Jali cepet hajé nyamber ntu pisgor, langsun dimamah kayak nggak ngerasa panas.

“Nyang sekarang ini,” Sukab paké lagi kopiah bututnyé, “bikin ané képo soalnyé nggak adé angin nggak adé ujan …”

“Percisnyé angin amé ujannyé belon ketauan kan Kab?”

“Itu dié! Bisa jadi kagak akan pernah ketauan.”

“Kok?”

“Pan udé dikasi tau nyang ini. Kalow ini ditelen, ya udé, gudbai ajé dèh semué.”

“Jadi jangan ditelen kan?”

“Ya jangan, udè jelas ini cumak umpan, nyang ngalihin perhatian amé jarum pancingnyé.”

“Pinter bener yé?”

“Nggak!”

“Lho!”

“Ané ajé tau! Pegimané orang-orang nyang pinter beneran!”

“Akal bulus?”

“Akal bulus nyang bulusnya bodo, jadi nggak kena!”

Semingkin laruik jalanan semingkin penu, macetnyé nggak ketulungan, semuényé garé-garé taon baru.

“Andé-katé sandiwaré, ini musti ditongton enggak Kab?”

Ntu pertanyaan dateng dari Mang Ayat.

“Naményé jugé sandiwaré …”

“Jadi?”

“Ya ditongton hajé,” kata Sukab, “nyang penting …”

“Apé nyang penting?” Jali udé nggak sabaran banget.

Sukab ngejawab bari cengéngésan. Tangannyé tau-tau kok udé pegang trompet kertas.

“Kité tau ntu sandiwaré,” katényé.

Pondok Ranji,

Senin, 30 Desember 2019. 22:47.

 

Be the first to leave a comment!

Leave a Reply

Your email address will not be published. Required fields are marked *