Sembér cidukin ntu sambel-godok Sukab dengen sumanget bélain ntu Menteri Ojèk.

“Napé yé angsal adé orang mudé dapet jabatan nyang tué bangké bolényé khèki,” katényé.

“Iri jabatannyé kali’?” Si Babé langsung ajé mancing.

“Enggak juga sih Bé, kayaknya lebih nyang dinamain ‘otoritas’ …”

“Nyang pegimané tuh Kab?”

Eh, sepagi gitu udé nongol hajé Si Kaboel. Bagus jugé, sebab artinyé lagi dapet kerjaan, èn jadinyé perlu sarapan.

“Yah tué-tué bangké ntu mikirnyé, ‘Kok jadi elu nyang pasang omong, émangnyé elu siapé?’, gitulah kiré-kiré yé?”

“Émangnyé omongan menteri nyang kayak apé?”

Dul Komprèng nyang masup. Émang biasé ntu kernèt dateng waktu ari mingsi gelap. Samé ajé ngambilnyé sambel-godok.

“Asyik jugé nih tiap ari kayak Lebaran yé Bé?” Katényé lagi.

“Tiap ari disyukurin ajélah, capèk nungguin ari rayé,” Rohayah udé muncul. Pan di gedong tinggi musti udé ngepèl pagi-pagi.

“Ngomong apé Si Ojèk?” Sambungnyé.

Sukab ngulang ajé pesen Si Ojèk.

“Gelar kagak ngejamin énté ntu ahli, lulus sekolé kagak ngejamin énté mampu kerjé, sekolé nyang dibilang puntennyé ‘A’ kagak ngejamin mutu pelajarannyé, èn kalow énté masup kelas ntu belon tamtu bakal bener-bener belajar.”

Bari nyarap, ntu manusiah-manusiah mikir bentar sabelonnyé cecuitan, kayak burung-burung di atas puun seabisnyé Subuh.

“Ané kagak sekolé èn kagak punya gelar bisé kerjé kok,” katé Bahlul tukang obat nyang mingsi laku ngibul di pasar-pasar pinggiran. Kayak nyang laèn juga, doi musti ambil kesempatan pertama nyamber rejeki, malah biasanya ampé malem mingsi jual kecap di trotoar.

“Kenapé tuh kiré-kiré Lul?”

“Ané punyak kemampuan dong …”

“Dari mane datengnyé ntu kemampuan?”

“Belajar juga dong,” ujar Bahlul sembér tancep ntu nasi kuning.

“Di mane? Emang adé sekolé tukang obat?”

“Ya amé tukang obat nyang laènlahyaw, nyang udé lebi dulu kerjé, nyang banyak pengalaman, nyang jagoan, pan mingsi adé nyang bekeliaran, paké uler, paké api nyang nyembur dari mulutnyé, ampé ditunggu kayak tontonan.”

“Nah, jadi kayak sekolé jugé kan?”

“Yo-i! Ané magang ngikutin ntu orang ke mané-mané, tidur bareng makan bareng, bawain barangnyé, bèrèsin semuényé, baca kitab-kitabnyé, ampé tau semué caranyé, semué idupnyé, semué pikirannyé, semué kibulnyé …”

“Émang kayak orang sekolé Lul, ntu belajar bener-bener naményé,” Si Babe dari jau komèn sembér goreng bawang.

“Jadi nyang ngejamin kemampuan ntu belajarnyé, bukannyé sekolé,” katé Sukab, “nah, kalow nyang ngejamin bisé kerjé kagak ya kemampuannyé.”

“Si Menteri Ojek bener dong omongannyé?” Ujar Jali tukang ojek non-aplikasi di pengkolan nyang mingsi ajé terus idoep.

“Ya iyalahyaw! Sekolé nyang isinyé kelas-kelas pan cumak nama tempat orang belajar, jadi kalow nggak adé nyang belajar di situ, ya walow nama resminyé sekolé, sabetulnyé belon bisé dibilang sekolé,” katé Sukab bari nyeruput kopi jagungnyé, “gampang hajé kan Li?”

“Guampaaaaaaang,” katé Jali, “artinyé bikin sekolé itu ya musti jadi tempat belajar nyang bener, soalnyé kalow nggak bener lulusannyé kagak punyé cukup kemampuan buat kerjé.”

“Soal calon pegawé negeri mesti lulusan sekolé punten A gimané dong Kab? Bisa aja kan punten sekolényé doang A, tapi kemampuan lulusannyé ternyata Z?”

Nyang nanyak Rohayah, nyang sering mesti milih tukang bersi-bersi gedung tinggi didasarin kemampuannyé, tapi terus kena kibul ijazah èn angka-angka hatsil ujian nyang tinggi, pédéhél kemampuan ngepèlnya amit-amit.

“Sekolé nyang bener, biar puntennyé A, B, apé C, semangat penjaminan mutunyé musti A. Ntu baru sekolé,” katé Sukab.

“Lha peraturan pegawé negeri itu? Cumak ambil lulusan sekolé punten A? Negara pan jadinyé nggak ngetès mutunyé dong.”

“Kalow emang adé nyang kayak gitu,” katé Sukab, nyang cidukin lagi ntu sayur sambel-godok, “artinyé kité idoep di negeri bermutu Z. Ntu guru-guru nggak perlu ikut-ikutan bego.”

Pondok Ranji,

Minggu, 15 Desember 2019. 21:55.

 

Be the first to leave a comment!

Leave a Reply

Your email address will not be published. Required fields are marked *