Seabisnyé namé-namé menteri diumumin, ntu warung semingkin ramé amé segalé macem pendapet, èn itu Kaboel si orang baru kayaknyé pas bener jadi moderator. Tamtu Sukab termasup nyang berapi-api itu pagi.

“Mister Joks ini émang bener-bener dèh,” katényé bari nyamber témpé karit, “mentang-mentang doi kerjé nggak mau bising, ditaroknyé Si Bowce jadi menhan. Apé nggak keléwat mahal ntu harga ketenangan yé?”

“Émang ketenangan doang nyang dipikirin Mister Joks?” Kaboel mulai ngarahin.

“Bukan ketenangan doi, ketenangan situasi politik, biar orang-orang nyang kerjé kagak keganggu. Limé taon tuh nggak lama kalow proyèknyé gedé-gedé kayak bikin ibukota baru segalé.”

“Bagus dong artinyé.” Nyang tadinyé nyaut tuh Si Jali, sisé-sisé laskar ojèk non-aplikasi.

“Itu dié! Bagus nyang pegimané?”

“Pegimané nyang pegimané?” Dul Komprèng mangsup-mangsup langsun nyamber omongan bari comot témpé méndoan.

“Atu nih,” saut Sukab, “kalow urusan han-han, émangnyé kagak ada orang laèn nyang mampu èn belon usia engkong-engkong nyang mustinyé udé pèngsiun. Ané bilang sih, kebangetan bangsa Indonesia kalow nggak adé orang laèn. Duè, dengen mangsupnyé Si Bowce ke jajaran kabinèt, udè jehelaas Mister Joks milih lebi baèk minggirin perasaan keluargé-keluargé nyang anaknyé diculik èn ampé ini ari belon balik.”

“Mmmmm,” Jali manggut-manggut sok bijak, “atu, bisé dapet ketenangan; dué, ntu terorisme èn radikalisme méhong pan émang kudu dibasmi.”

“Itu nyang mingsih perlu dibuktiin. Atu, émangnyé kalow Bowce jadi mentri lantes temen-temen Mister Joks nggak bakalan bikin bising? Sami mawon! Naményé politik, kalow nggak bising ya bukannyé politik, tapi pertapaan. Nggelibed, gerak tipu, tipu dayé, manipulasi kejutan, pan emang kayak gitu ari-arinyé politik … “

“Salé langké dong Mister Joks?” Kening Jali udé maèn bekerut ajé.

“Nggak bisè dibilang begicu,” katé Sukab bari ambil bungkusan nasi uduk ikan teri, “kite musti anggep semuényé udé dipikirin, diomongin, sabelonnyé diputusin. Ané anggep ini keputusan nyang perlu keberanian, musti adé nyali ngadepin mulut-mulut nyang bakal mangap. Paling adil ya kité kasi kesempetan. Pan Mister Joks jugé udé bilang, nyang kerjénya kagak bener bakalan dicopot.”

“Iyé yé, kité liat ajé,” ujarnyé Si Bahlul.

Semingkin terang langit, atu-atu muncul ntu para pelanggan tetap warung Mang Ayat. Mamik tukang kopi saset amé bininyé Si Rohayah boss tukang pèl gedong tinggi, Hasan tukang bangunan. Adé nyang ambil nasi guri, adé nyang ambil nasi bakar, adé nyang nyomot nasi kuning. Emang kumplit bener adényé nasi di warung Mang Ayat.

“Songal tukang ojèk dijadikeun mentri pendidikan dan kebudayaan pegimane tuh?” Kaboel mulai lagi.

“Hmm, soal doi amé kebudayaan ané nggak tahu dèh, itu kan perkaré nyang adé nggak adé mentrinyé, kebudayaan tetep bisè nglairin menteri, hehehehe! Tapi soal pendidikan ulah diliat tukang ojèknyè, liat pegimane doi nyulap tukang ojèk nyang tadinyé nongkrong jadi sibuk boncèngin orang garè-garè sistem aplikasi, bolényé orang nyari ojèk kagak usyè jalan kaki ke ujung gang,” katé Sukab, “kalow teknologi ginian di pendidikan bisé bikin anak-anak kité di daerah terpencil samé pinternyé amé nyang di koté, itu artinyé Mister Joks pinter mili mentrinyé.”

“Tapi belon kan?” Hasan nyelak.

“Belon apé?”

“Belon terbukti.”

“Belon terbukti gagal, gitu dong, kalow semua anak Indonesia pinter kan nggak adé lagi polemik-polemik nyang sama begonya, jadi otak kité nggak perlu keganggu.”

“Iyé yé, nyang penting pan hatsilnyé katé Mister Joks, bukan prosèsnyé,” kate Rohayah.

“Justru di omongan itu mangsalah Mister Joks.”

“Napé.”

“Itu samé ajé tujuan menghalalkan cara.”

“Wueitz! Gawat dong …” Dul Komprèng ampé bediri ngomongnyé.

Sukab cengèngèsan.

“Ngggaaaaakkkk …. Nggak gawatlah …..”

“Lho hasil menghalalkan proses kan gawatlah ….”

“Mister Joks kan emang bukannyé Insinyur Kata-Kata, pasti bukan itu mangsudnyé.”

“Pasti? Bukannyé lihat buktinyé dulu? Kité udé liat doi nggak pikiran perasaan Ibu-ibu Kamisan.”

Cengèngèsannya Sukab ilang.

“Adé nyang disebut utilitarianisme Dul, Boel, Lul, kepentingan nyang lebi sedikit bisé dikalahin demi kepentingan orang nyang lebi banyak.”

“Kalow emang nggak adé orang laèn ketimbang Si Bowce kan?”

“Yo-i, kalow emang nggak adé orang laèn.”

“Nah, kalow ternyaté adé?”

“Mengatasi han-hanan sekalian kebisingan?”

“Yak!”

Sukab udé cengèngèsan lagi.

“Ya artinyé mèhong.”

Pondok Ranji,

Sabtu, 2 November 2019. 09:36.

 

Be the first to leave a comment!

Leave a Reply

Your email address will not be published. Required fields are marked *