“Kab, apé sih bédanyé manusiah amé monyèt?”

“Jawaban nyang biasé kan?”

“Apé tuh nyang biasé?”

“Ya nyang biaséééé, manusiah paké otak, monyet kagak.”

Mang Ayat, nyang lagi tuangin aèr panas ke gelas belimbing nyang berisi kopi jagung, jidatnyé jadi kripet denger omongan Sukab amé Dul Komprèng. “Mingsih pagi udé soal nyang lagi panas…,” pikirnyé.

“Nhaa, kalow manusiah nyang ngatain manusiah laèn ‘monyèt’, pegimané?”

“Ya doi nyang monyèt.”

“Napé?”

“Kan kagak paké otak.”

“Pédéhél otaknyé adé yé?”

“Adé!”

“Tapi nggak dipaké.”

“Nggak dipaké!”

“Èn sebab nggak dipaké?”

“Samé ajé monyèt!”

Dué gelas belimbing nyang isinyé kopi jagung ngepul, begitu disruput Si Dul langsun ajé panasnyé matil.

“Huwaduh panas!”

Sukab nyengir bari tiupin kopi.

“Berpikir jugé begicu Dul, kagak bisé barang ambil simpulan, ntar bisé kebakar semué kalow awur-awuran.”

“Bukannyé udé?”

Itu suaré Rohayah, masup bareng Mamik lakinyé nyang ngasong kopi sasetan.

Sukab keliatan nyang kayak cius berat nanggepinnya.

“Kayaknyé ini pekaré nyang paling berat buwat Jokowi. Duit bolé diamprokin, rèl keréta bolé nyambung kluar masup gunung nyambungin Sentani, Waména, ampé ke Agats, itu nggak bakal cukup buat ngebayar nyang naményé ngatain ‘Monyèt’.”

“Kan biasé anak mudé …” Bahlul masup gembolin karung obat-obatnyé.

Sukab gebrak meja ampé dunié serasé goyang.

“Luuuuullllll! Bégo banget sih énté Luuuuuuullllll! Ini bener-bener gawat tau nggak? Énté nyadar nggak apé artinyé ntu reperendum?”

“Mangsudnyé milih R.I atawa Papua gitu kan?”

“Yo-i!”

“Nggak akan kejadian itu Kab!” Jali udé masup ajé, “Sejarah Papua beda amé Timor Timur nyang sekarang udé jadi Timor Lèsté!”

“Ané tau bangetlah Li!”

“Énté tau kan Kab, Papua jadi bagian R.I ntu dkrisahihin PBB?”

“Yo-i! Samé ajé kayak hatsil reperendum Timtim duepulu taon lalu!”

“Nhaaa, apényé nyang gawat?”

“Idénya Bung Jali, idénya!”

“Napé émang idénya?”

“Karena kedengeran adil!”

“Huweits! Ati-ati Kab! Énté bisé disangkain kontra NKRI loh!”

Sukab seruputin ntu kopi jagungnyé bari mèsem.

“Justru ané ngingetin, apé nyang bikin idé reperendum itu nongol? R.I ngejajah Papua kan? Émangnyé énté mau dibilang penjajah Papua?”

“Ya enggak dong, kurang kerjaan ajé!”

“Asal tau ajé dulu Belandé jugé ngatain kite-kité monyèt loh! Sama nggak tuh?”

Orang-orang bungkem, tapi mulutnyé nyarap nasi kuning paké teri.

“Ini soal kan dibikin orang Kab?” Hasan buruh bangunan masup.

“Dibikin pegimané?”

“Ntu nyang dibilang buang bendéra belon jelas gimané-gimanényè, trus nyang nyerbu ke sono juga nggak murni pecinta R.I sejati.”

“Ané jugé udé mikirin ntu perilaku, tapi bener apé nggak bener pan semué borok jadi ketauan sekarang. Ini konflik dijual, nyang beli banyak. Nyang nggak suka R.I, nyang nggak suka pemerintahan Jokowi, nyang nggak suka orang Papua, semuènyè nèbèng ini urusan èn maunyé ngambil keuntungan dari kekacauan …”

“Pusinglah Jokowi! Apé lagi idé reperendum itu maèn berédar ajé yé?”

“Futzing! Mangkényé musti dibantu. Hukum nggak akan lolosin reperendum, tapi orang kan jadi mikir, pegimané caré ngukur kecintaan orang Papua amé Papua Barat sama R.I toh?”

“Jokowi nyang Pérsidén ajé futzing, emang kite bisé apé Kab?”

“Kalow kité ketemu temen Papua, jangan cumak diliatinlah …”

“Tapi?”

“Tunjukin énté hormat amé ntu Brader.”

Pondok Ranji,

Minggu 1 September 2019. 13:08.

 

Be the first to leave a comment!

Leave a Reply

Your email address will not be published. Required fields are marked *