Itu malem 22 Mei sial bener nasib Si Bahlul. Sekarung dagangan obatnyé ludes di tengé Jalan Petamburan. Bukannyé ludes laris manis. Boro-boro. Dagangannyé ludes abis ancur-ancuran kelabrak massa nyang ngamuk kayak naga genit. Doi pikir ntu tempat pan jau dari Gedung Bawaslu nyang jadi sasaran demo, eh garé-garé gagal ngaco di sono èn keusir ke Petamburan, kok jadi maèn kayu. Mobil kaga’ sale dibakar. Warung amé kios dirusakin èn dijarah.
Bahlul tadinyé mau gelaran ngocol jual obat-obat bin vitamin ke Tenabang. Belon nyampé sono angkotnyé nggak brani terus, malahan ampir ikutan disulutin korek api tempat bensinnyé. Orang banyak nyang beringas nyamber apé ajé dari jalanan, tas segedé karung nyang digembol mulu amé Si Bahlul kaga’ ketinggalan.
“Pejajaran sial dangkalan,” ujar Si Bahlul begitu masup, bari kipas-kipas pake topi tiker pandan.
“Huss! Mingsih bulan puasé jangan nyumpé dong!” Rohayah ingetin.
“Nyumpé kaga bolé? Oké. Mbakar mobil bolé nggak? Nglemparin batu bolé nggak? Punyé pikiran jahat bolé nggak?” Bahlul ndremimil.
“Eh, kok jadi politis urusannyé?”
“Politis nggak politis deh! Emangnyé nyang rakyat nggak bolé terus pemimpin bolé? Trus kalow mimpin, kenapé mimpin nyang kayak gitu? Nggak ngaku lagi! Emang ntu orang-orang bawak bendera kayak jaman baheula kaga adé nyang suru? Nyumpéin nyang kayak gitu mah belon seberapé Yah!”
Sukab senyum dikulum.
“Barang énté disamber cecéré-cecéré nyolotnyé jadi ke sono Lul?”
“Lhah cecéré ini kan émang cumak dibodo-bodoin Kab, paké duit, paké sorga, apé ajé nyang bikin doi jadi nekad lemparin polisi paké batu èn petasan. Héhé! Petasan! Emang mau nduluin Lebaran?”
Masup Dul Komprèng kernèt mikrolèt.
“Politik lagi politik lagi. Capé dèh,” ujarnyé bari banting topi NY tiruannya ke meja, ampé nyaris jatuhin tajil, “mana jalanan kosong, nggak ada penumpang, semua orang mending main gém di rumé.”
“Nah, bisa énté pikirin nggak apé maunyé orang bégo nyang sengajé bikin kerusuhan ini?” Tanyé Sukab sambil ngelirik tajil nyang kayaknya huenak ruar biasa.
“Ya bikin rusuhlahyaw!”
“Emang kenapé kalow udé rusuh?”
“Kacow balow toh?”
“Yo-i! Èn kalow udé kacow?”
Dul Komprèng pun ngomong kayak orang maèn sandiwara.
“Maka berlangsunglah yang disebut anomali …”
Jali, Hasan, Mamik nyang baru masup mau buka di warung rada kaget liat Dul Komprèng kayak begitu.
“Persiapan tujubelasan Dul?”
“Tujubelasan? Ada orang ngacok paké ilmu kéré tahu nggak?”
“Ilmu kéré nyang kayak dulu? Nyang ngandelin isyu béda agama, béda warna kulit, béda suku?”
“Kagak. Ini ilmu kéré kedua,” kata Dul Kompreng, “cumak rada mirip lima tahun lalu, jadi gampang ketebak.”
“Apé tuh?”
“Hatu, pegimané caranyah berhasil jadi kacow. Inget ilmu mancing di air butek? Jadi butekin dulu aèrnyé, barulah mancing-mancing. Dué, kibul ini amé kibul-kibul laèn bisa bikin kesahihan pemenang Pemilu keganjel, èn selama belon sahih selama itu juga nyang bikin kacow punyé waktu.”
“Waktu? Untuk apé?”
“Ya apé ajélahyauw!”
Senyum Sukab melebar. Kalow rakyat bisé ngebacé ilmu kéré kayak gitu, negaré bisé aman tenteram damai sentosa. Pegimané kalow kagak?
“Ngomong-ngomong kenapé naményé ilmu kéré yé?”
Mang Ayat ujug-ujug nyeletuk, bari pindahin nasi nyang ngepul ke tenggok. Beberapa menit lagi emang bakal bedug Magrib.
“Udé jahat, licik, curang, gampang kebaca, ngorbanin nyawa anak orang pula,” katé Sukab bari nyamber tajil kolak.
Terdengar bedug derugdug-dug-dug disusul suara azan.

Pondok Ranji, Jumat 31 Mei 2019. 22:14.

 

Be the first to leave a comment!

Leave a Reply

Your email address will not be published. Required fields are marked *