“Lembaga survai!”

Suaré Sukab nyaris nggak kedengeran ditengé ujan deres nyang  bikin budeg. Tapinyé kebudegan kuping nggak ngalangin orang pesen apé ajé nyang dijajain Mang Ayat ntu soré nyang lagi ramé-raményé orang pulang kerjé.

Kopi, pisang gorèng, témpé mèndoan, témpé bacem, tahu bacem, semuényé ditancep ame perkoncoan nyang itu-itu jugak. Sukab, Dul Kompreng, Bahlul, Jali, Hasan, Mamik, Rohayah, tumbèn bisé tumplek bleg barengan di situ. Mingsih ditambahin orang-orang nyang numpang betedu ajé, èn basa-basinyé ya pesen kopi bari nimbrung omongan jugé. Paling untung ya nyang punyé warung toh? Mang Ayat senyum-senyum diuntung ajé dengerin obrolan nyang semingkin seru.

“Emang kenapé ntu lembaga survai Kab?”

“Itu dié! Survai apé survai?”

“Ya survailah Kab, kalow kaga’ ngapain émangnyé?”

“Kalow survai ya survai ajalah, masa’ lembaga survai trus jadi lembaga pemenangan jugak, mané bolélahyauw!”

“Napé nggak bolé Kab? Kalow méntal miskin kan péngin kaya!”

“Pegimané sih énté Lul, mau kaya sih bolé-bolé ajé, tapinyé apé ntu survai hatsilnyé bisé bener?”

“Emang bisé begicu?”

“Lhah, kalow énté dibayar untuk menangin satu kelompok, pegimané caranyé ngasih tau kalow ntu kelompok susyé menangnyé?”

Dul Komprèng mikir bari nelen mendoan.

“Mustinye ya biarin ajé toh kalow hatsilnye juelek?”

“Yo-i! Ntu kan juga bagus bakalan bebenah!” Kate Rohayah.

“Nhaaaa! Kadang nyang pesen ini bégo, dikasi hatsil juelèk maré-maré, songalnyé dipaké kampanye kubu lawan,” sahut Mamik lakinyé kendiri.

“Pokoknyé kalow ané sih,” ujar Sukab, “nyang disebut lembaga survai dalem urusan politik kaga’ bisé ngejob. Susahlah. Ntar adé nyang disebut konplik op interès kaga’ bisé ngatasin pastinyé.”

“Biar ajé kismin mangsudnyé?”

“Kismin tapi sombong dong, masa’ intelektual nggak punya sikap nyang dikit teges amé duit?! Ya ‘kan?!”

“Ah, intelèktual sekarang mana pulak intelèknya,” ujar Jali bari nglempusin krètèknyé.

“Wuih tukang ojek non-aplikasi angkat bicaré,” komèn Si Hasan, “émang nape bisé begicu Li?”

“Otak pinter mah Sangkuni juga pinter kan? Mangsud sebutan intelektual ntu kan adé jugak beban moralnyé.”

“Wueitz! Moral mèn! Udé jarang ntu dengernyé! Tapi mangsud énté amé mohooooorraal apé?” Bahlul masup omongan bari tancep bubur ketan item nan anget.

“Kaga’ berpihaklahyaw!”

“Cocok Li, tapi itu mah udé nggak laku!” Sukab masup lagi.

“Begitu? Apa jadinyé dong kalau beban moral dibuang hajé?”

“Ya jangan dibuanglah, tetep dipaké!”

“Mangsud énté? Bermoral tapi bisé dibeli?”

“Huaduuuhh, dibeli mah tabu dong, tapi nggak semua nyang dibayar itu salé yé, sama sekali kaga’. Kalow doi survai sabun wanginye kayak ape nyang didemenin orang, bakal perusahaan sabun nyang bayarin doi ya tancep hajé toh?”

“Futzing dah palé ané! Kalow di politik nggak boleh berpihak énté bilang udé kaga’ laku, nyang laku jadinyé berpihak dong!”

“Yo-i!”

“Huzzz! Pegimané ntu moralnyé Kab?!”

Sukab mèsem liat Si Jali garuk kepalé nyang udé mangkin sedikit rambutnyé.

“Énté pegimané sih Li,” ujarnyé bari ambil cangkul amé pengki, “apé nyang bisé lebi bemoral daripadé ngebélain rakyat kecil nyang lemah èn nggak berdayé?”

Ujan udé mandeg. Jali mangggut-manggut.

“Boleh berpihak, angsal berpihak amé nyang lemah èn kagak bedayé.”

Tapinyé terus inget sesuatu.

“Pegimané caranyé?”

Sayangnya Si Sukab udé ngilang …

Heerhugowaard,

Rabu 27 Maret 2019. 14:09.

 

Be the first to leave a comment!

Leave a Reply

Your email address will not be published. Required fields are marked *