Pagi buté udé penu ajé ntu warung. Semué orang gegares nasi uduk Mang Ayat nyang udé sohor, ampé semué orang tau kalow nggak cepet-cepet pasti udé keabisan sebelonnyé terang tané. Nyam-nyam, asyik bener pade nyarap, bari denger penyiar tipi bacain berita kampanye Pilpres.

“Tim kampanye nasional pasangan Jokowi dan Ma’ruf Amin mengungkap tekad untuk merebut dukungan dari Jawa Barat, Banten, dan Sumatra Barat, tempat Jokowi dan Yusuf Kalla kalah dengan angka besar pada Pilpres 2014 oleh pasangan Prabowo dan Hatta Rajasa.

“Sementara itu, tim kampanye Prabowo dan Sandiaga Uno mengumumkan telah bersiap dan mengarahkan pandangan ke Jawa Tengah, yang lama dikenal sebagai kubu PDI-P. Bahkan tim Prabowo mengungkap strategi kunci dengan memindahkan markas besar kampanye ke Surakarta, Jawa Tengah, kota tempat tumbuhnya Jokowi sebagai politikus, ketika menjabat sebagai walikota.”

Omongan penyiar mingsih aje ngalir, nyebutin alesannyé kubu Prabowo, nyang katényé ngeliat hatsil pilgub Jateng, Sudirman Said nyang disorongin kubu Prabowo bise dapet 41% suare lawan 58,7% suare nyang didapetin Ganjar Pranowo temennyé Jokowi. Katényé itu nglebihin itungan sabolennyé pemilihan, jadi nape kaga’ ditancep?

“Enté denger tuh Kab,” ujar Dul Komprèng nyang mulutnyé mingsi penu nasi, “strategi …”

“Ntu kubu Jokowi udé langsun nanggepin,” saut Sukab, “katényé lime taon lalu doi paké tim Pandu Juang nyang menangin Ganjar. Katényé ini ari udé lebi kuat lagi.”

“Iye, iye, taon 2014 di Jawa Barat ntu Jokowi cumak menang di ampat dari 26 koté. Wajar aje doi kaga’ mau kecolongan, malah kalow bisé nambah bagus kan?” Ini kali Bahlul pasang omong.

“Èn kubu Prabowo mikirin nyang sama, pas kubu Jokowi nancep Jawa Barat, Banten, amé Sumatra Barat, doi tanceplah Jawa Tengé,” Jali tukang ojek non-aplikasi pun pagi buté udé nongol mau nyabet peruntungan.

“Tetep ajé ané heran Kab,” kali ini Dul Komprèng udé ketelen nasinyé, “strategi kok dibilang-bilangin ke wartawan yé? Kalow lawannya denger kan jadi mikir pegimané matahinnyé!”

“Mangkényé ….,” Sukab nggak nerusin omongan, musti nelen tempe dulu, lantes didorong teh tawar anget.

“Mangkényé apé?” Bahlul ngedesek.

“Bentar dong Lul,” Sukab ngelap mulutnyé paké punggung tangan, “nggak sabaran amat sih?”

“Ané udé mau jalan ni ..”

“Mau jalan?  Ngopi ajé belon Lul.”

“Ah rèsè lu Kab, kalow paké ngopi-ngopi kapan ané kerjé? Tapi ané péngin denger apé nyang énté mau bilang.”

Sukab mèsem ke-gé-èr-an.

“Bagus jugé énté mau pinter Lul,” katényé, “pinter nyang paké nanya-nanya, bukannyé nyang mau ujug-ujug ajé kayak anak sekarang.”

“Huss! Ané punya anak pinteran Kab.”

Sukab mèsem lagi.

“Pinter ngeklik Mbah Gugel mangsudnyé? Pinter itu di sini Lul,” Sukab nunjuk jidatnyé, “bukan ngandelin mesin. Bener isinyé inpormasi, tapi inpormasi ntu mau diapain ya ngandelin ini duonk! Inpormasi ntu cumak bahan, bukannyé jawaban. Kalow dijadiin jawaban angguran digoreng ajé kite punya otak lantes tarok di restoran Minang. Bukannyé jawaban nyang penting Lul, Bahlul, tapinyé proses nemuin ntu jawaban. Paham?”

Mingsih ajé Sukab ketok-ketok jidatnyé kendiri paké telunjuk, tapi romannyé kayak jèngkèl amé nyang laèn, bukan amé Si Bahlul.

“Nah, jadi apé katé otak énté Kab?” Bahlul penasaran.

“Strategi ntu mustinya kaga’ dikasih lihat kan?”

“Yo-i!”

“Jadi kalow dibilang-bilangin mingsih strategi apé bukan?”

“Bukan.”

“Jadi kalow strategi dibilang-bilangin artinyé?”

Bahlul amé nyang laèn-laèn diem ajé, tapinyé mulut mereka kaga’ ngunyah lagi. Sukab nerusin.

“…… artinyé ya tipu dayé! Iya kan?”

Bahlul manggut-manggut.

“Iyé jugé yé.”

Tapi Sukab mingsih ngegodain.

“Bisé jugé sih bukan tipu dayé … Tau nggak?”

Bahlul tukang obat nyang di kaki lime pinter cumak kebuké mulutnyé. Sukab ambil cangkul ame pengkinyé siap jalan.

“Kalow bukan tipu dayé …  ya artinyé bégo beneran!”

Pondok Ranji,

Jumat, 14 Desember 2018. 14:31.

 

Be the first to leave a comment!

Leave a Reply

Your email address will not be published. Required fields are marked *