Tau’ nape ntu ari Sukab bolak-balik nyanyiin lagunyé Deddy Dhukun:

bohong

kamu suka bohong

 

Cumak nyang doi nyanyiin bagian itu melulu. Kaga’ jehelas apé cumak itu taunyé, apé émang sengajé, nyang kejadian sih orang-orang di warung padé ikutan, walow cumak lagi-lagi bagian itu doang.

bohong

kamu suka bohong

 

Segini laruiknyé, ntu warung jadi ramé amé orang riang-gembiré. Mang Ayat mah senyum-senyum ajé di balik kumisnyé nyang singkur kayak Nietzsche. Tapinye sembari ngegorèng sambel terasi buwat nyetok besoknyé doi ngomong jugé.

“Huss! Huss! Huss! Ini ari ajé yé nyeneng-nyenengin Deddy Dhukun walow nggak bayar royalti. Kalow bèsok-bèsok mingsih nyanyiin nyang beginian, ramé-ramé lagi, jadi sirik dèh …”

“Héhéhé, bèsok jugé belon pugu ngumpul begini Bé,” katé Sukab, “ya nggak Dul?”

“Yo-i!” Dul Kompreng kernet mikrolet nyautin,”Lagian cumak soal bo’ong kan? Bo’ong nyang udé diakuin lagi! Ampun dèh! Ngapain yè amè anak ajé bo’ongnyé ampé musti kayak gétu?!”

“Jadi mikir ni Bé, kalow adé nyang mikir ini bangsé dari conto nyang kayak begicu pegimané yé? Ibu bo’ong ke anak, bo’ong ke pimpinan, eh jadi pimpinannye kebawa bo’ong deh …”

“Mané bo’ongnyé keburu dimangpaatin!” Bahlul tukang obat begitu masuk langsun nimbrung.

“Salényé kendiri! Ibarat katé orang lagi apes ngapain jugé dijual-jual!” Si Dul nyambung.

“Begitulah orang politik Dul, paling cepet ngejual isyu nyang nguntungin politik dirinyé.”

“Capeklahyaw!”

“Entar giliran kebuka’ bo’ongnyé, eh gantian kubu lawannya tuh nyang mangpaatin. Paling-paling dèh!”

“Tapi ngelèsnya boleh juga loh!”

“Bukan ngelèslahyauw, malah kesempatan jadi orang baèk. Héhé!”

“Malu atilahyauw!”

“Kemegmegan pastinyé!”

“Hahahaha!”

“Héhéhéhé!”

“Huhuhuhu!”

“Nyang ané kecian, ntu tokoh-tokoh besar musti ngliatin kebesarannyé garé-garé urusan cepété. Amit-amit déh!”

“Kubu lawannyé dong pesta pora.”

Nyampe di sini Sukab jadi rada serius.

“Nah, itu nyang ané kaga’ demen. Mangsalé kecik kelewat digedé-gedéin ampé semué orang musti tau, pédéhél kaga’ adé guné.”

“Semué orang jadi konyol yé?”

“Iyélahyauw! Kité-kité jugé! Kayak kaga’ adé nyang lebi serius ajé di dunié.”

Semuényé manggut-manggut prihatin. Cumak Mang Ayat nyang mingsih mèsem.

“Ah, tapinyé kalian ketawé jugé padé,” katényé sembari nata piring bersi, “selinganlah, ketimbang poré-poré serius pédéhél bokis?”

Semuényé sekarang mèsem jugé, tapi Sukab semangkin serius, mukényé ampé bekerut.

“Mangsalényé Bé, selingannye berumbuk nyambung kaga’ ade abisnyé, lhah nyang serius itu jadinyé cumak selingan. Bo’ong ajé dikembang-kembangin, giliran diminta serius kaga’ adé nyang nyampé.”

“Mesti diorak-orak kali’ Kab.”

“Yo-i! Nggak usahlah berita bo’ong ngabisin baterai, ngabisin listrik, ngabisin pulsa, ngabisin tenagé, ngabisin duit, ngabisin waktu, ngabisin perhatian,” Sukab bener-bener serius, “kapan kite mau bener-bener serius, en bukan pore-poré serius? Kapan? Kapan, kapan, kapaaaaaannnnnn?”

Lantes doi bediri, ambil pacul ame pengkinye.

“Gitulah Bé,” ujarnyé dengen kening mingsi bekerut, “ape salah kalow kite serius, begitu serius, kayak nggak adé nyang lebi serius?”

Tapi semue ude kecapekan. Sukab pigi. Malem semangkin laruik. Orang-orang ikutan pigi. Kalow mingsi mau makan, musti kerja bèsok.

Pondok Ranji,

Minggu 14 Oktober 2018. 13:12.

Gambar: dokumentasi seni rakyat PanaJournal.com

 

Be the first to leave a comment!

Leave a Reply

Your email address will not be published. Required fields are marked *