DOKUMENTASI SENI RAKYAT PANAJOURNAL.COM

“Politik ntu nape ora bisa pugu ye Bé? Nape ntu kudu ke sono-sini ora ketauan maunyah? Eh, bujugbuneng tau-tau bolenye pecé. Ntu ade partai nyang sebelé dukung capres nyang belon perné jadi presiden, sebelényé lagi dukung capres nyang perné jadi presiden. Pagimanah ntu Bé?”

Nyang ngomong Si Jali tukang ojek non-aplikasi. Kurang kerjaan bikin doi nangkring mulu di warung Mang Ayat, nyalah-nyalahin ape aje nyang bise disalahin. Nempo begicu Mang Ayat kaga’ mau sembarang sok bijak.

“Emangnye bener ntu partai kebagi due? Bukannye petinggi-petinggi doang nyang pecé-belé?”

“Iye ye,” Jali manggut-manggut kaga’ jelas ape nyang dimanggut-manggutin, “itu namenye bukan kebelé dué, tapi amburadul aje nyang pade jadi pimpinan. Noh, minte jadi pagimanah ntar bawahannye?”

Kalow ude begicu Mang Ayat mah tinggal ngegongin aje. Ibarat kate gamelan Jawe, nabuhnye cumak sekali nyang paling belakang. Guuungngng …   Apelagi kalow lantes masup Sukab mau ambil doi punye pacul ame pengki dibawe bangku.

“Emangnye gampang jadi pimpinan, kalow partai aje sale urus, pegimane koalisinye,” main samber aje Sukab kayak nyang tau pekare, “nah, kalow koalisi haje kage bise kompak, pegimane mau ngurus negare!”

“Yo-i! Tapi boleh kan kalow ade nyang mau jadi presiden?” Ini kali Hasan buruh bangunan nyang kaga’ mau nglembur selepas maghrib nyang nyocor.

“Oooohhhh ya bolehlahyauw! Nyang jadi soal kan kalow ade perpecahan di partai, nyang ngedampak ke koalisi, kite orang bise ngejangke kepuguhan ntu pimpinan,” jawab Si Sukab.

Ari ude tambe gelap. Bentar lagi masup waktu Isya’. Di depan ame belakang warung, dua jalanan ngejepit sepotong lahan liar tempat Mang Ayat ngediriin warungnye. Kayak nyang tinggal tunggu kapan digusur en ilang runtu belon ketauan ke mane mau pinde. Nyang begini-begini kaga’ sedikit di Jakarta, nyang saben detiknya berubé, diubé, en mengubé.

Orang-orang pade makan malem pake lauk semur jengkol. Mang Ayat ujug-ujug nanya ame Sukab.

“Mingsih inget cerite Ramayana, Kab?”

Sukab jadi inget kampung halamannye waktu mingsih kecik. Suka ngantuk-ngantuk nongtot wayang kulit di belakangnye ntu layar.

“Mane bise lupe Bé, meski dalangnye ngomong Jawe. Mane dari bayi méré ude ditarok di baliknye layar melototin bayangan.”

“Nha, jadi inget dong nape raja raksasa sakti nyang kaga’ bisa matek …

“Rahwana?” Sukab nyelak aje.

“Yo-i! Kenape Rahwana nyang punggawenye serba sakti bise kale ame pasukan monyet?”

“Oh, itu! Iye! Ade nyang berkhianat kan?”

“Gunawan Wibisana, inget kan? Resia pasukan Alengkadirja semue ude kepegang ame doi, mangkanye pasukan monyet pimpinan Hanuman nyang menang.”

Sukab inget semua, tapi belon ngeh mangsud Mang Ayat.

“Biar berkhianat, Si Gunawan tuh wayang sebele kanan Bé, wayang baék.”

“Sekarang pegimane Kumbakarna, Kab?”

“Eh, wayang baek juga, pedehel kalow Si Gungun tadi nyebrang ke kubu lawan, Kumbakarna mati di pihak Rahwana.”

“Jangan salah Kab, Kumbakarna matek ame Laksmana bukannye karena pro Rahwana, tapinye demi Alengka …”

“…… karena kaga’ suka abangnye nyulik Dewi Sinta!”

“Nah! Lumayan juga ente sebage tukang gali tane Kab,” ujar Mang Ayat, “jadi ude paham mangsud ane?”

“Mangsud ape ye?”

“Lhah! Ente bletak-bleneng angguk-anggukin pale ‘karang mikir dong!”

Sukab lantes bener-bener mikir sembari nenggak aer kendi segelas. Nyang laen-laen mingsih asyik ngabisin semur jengkol bikinan Yati.  “Perpecahan ye, Bé?”

“Itu die Kab! Mangsud ane, kalow becermin ame wayang, politik Rahwana ntu cumak ngebawe perpecahan, ade Kumbakarna ade Wibisana, nyang satu mengabdi nyang laen nyebrang ke kubu lawan en jadinye saling ngancurin. Rugi kan?” Si Jali tukang ojek non-aplikasi nyautin.

“Satu partai, pendukung pecah adep-adepan. Iye ye Bé, bukan kebelah due, ini permusuhan segitigé.”

“Perpecahan politik namenye,” Mang Ayat ngegongin sambil ngelap piring.

“Mangsalahnye, Rahwana ntu, meski ntar kalah, tetep kaga’ bise matek. Iye ‘kan?”  Tanya Sukab sembari nyengir nggak ngarep jawaban.

Pondok Ranji, Sabtu 15 September 2018. 00:40.

 

Be the first to leave a comment!

Leave a Reply

Your email address will not be published. Required fields are marked *